काठमाडौं । अमेरिकी राष्ट्रपति निर्वाचनमा डेमोक्रेटिक पार्टीकी उमेदवार कमला ह्यारिसको विजयी सम्भावना घट्दै गएको छ । 

सात स्विङ राज्यमध्ये तीन वटामा रिपब्लिकन पार्टीका उमेदवार तथा पूर्वराष्ट्रपति डोनाल्ड ट्रम्पले जित निकालेपछि ह्यारिसको विजयी हुने सम्भावना खुम्चिदै गएको हो ।

अमेरिकी राष्ट्रपतिमा विजयी हुन कुल ५३८ मध्ये २७० इलेक्टोरल भोटको आवश्यकता पर्छ । डोनाल्ड ट्रम्पले पेनसिल्भेनिया, जर्जिया र नर्थ क्यारोलिना जस्ता स्विङ राज्यमा जित निकालेपछि उनी विजयनजिक पुगेका छन् । 

हाल ५३८ इलेक्टोरल भोटमध्ये ट्रम्पले २६६ भोट पाइसकेका छन् । ह्यारिसले १८८ इलेक्टोरल भोट प्राप्त गरेकी छन् । अब चार भोट पाए ट्रम्प अमेरिकी राष्ट्रपतिमा विजयी हुनेछन् । 

अरिजोना, मिचिगन, विस्कन्सिन र नेवाडा जस्ता स्विङ राज्यमा मतगणना जारी छ । 

अमेरिकामा केही राज्यलाई रिपब्लिकन पार्टीको गढ मानिन्छ भने केहीलाई डेमोक्रेटिक पार्टीको गढ मानिन्छ । तर, केही राज्यहरू छन् जहाँ जित वा हार भविष्यवाणी गर्न गाह्रो छ । तीनलाई स्विङ राज्य भनिन्छ ।

यसपटक पनि सातवटा स्विङ राज्यले निर्वाचन कस्ले जित्ने भन्ने निर्णय गर्नेछन् । यी स्विङ राज्यहरूको नाम एरिजोना, जर्जिया, मिशिगन, नेभाडा, नर्थ क्यारोलिना, पेन्सिलभेनिया र विस्कन्सिन हुन् ।