काठमाडौं । अमेरिकाका सात स्विङ राज्यमध्ये दुई वटामा रिपब्लिकन पार्टीका उमेदवार डोनाल्ड ट्रम्प विजयी भएका छन् । ती दुई स्विङ राज्य हुन्– नर्थ क्यारोलिना र जर्जिया । 

अमेरिकी राष्ट्रपतिको लागि भएको मतदानको मतगणना जारी छ । अधिकांश स्विङ राज्यमा ट्रम्प अगाडि छन् । 

सन् २०२० मा भएको राष्ट्रपति निर्वाचनमा ट्रम्प झिनो मतान्तरले मात्र जर्जियामा पराजित भएका थिए । यसपटक भने ट्रम्पले जितेका छन् । 

ट्रम्पले स्विङ राज्य पेन्सिलभेनियामा पनि जित्न सक्ने सम्भावना बढी रहेको छ । योसँगै एरिजोना र विस्कन्सिन राज्यमा पनि ट्रम्प आफ्नो प्रतिद्वन्द्वी डेमोक्रेटिक पार्टीकी उमेदवार कमला ह्यारिसभन्दा अगाडि छन् । यी दुई राज्यमा आधाभन्दा बढी मत गणना भइसकेको छ ।

मिशिगनमा कमला ह्यारिस ट्रम्पभन्दा अगाडि छिन् । यहाँ हालसम्म ३२ प्रतिशत मात्र मतगणना सकिएको छ । 

अमेरिकामा केही राज्यलाई रिपब्लिकन पार्टीको गढ मानिन्छ भने केहीलाई डेमोक्रेटिक पार्टीको गढ मानिन्छ । तर, केही राज्यहरू छन् जहाँ जित वा हार भविष्यवाणी गर्न गाह्रो छ । तीनलाई स्विङ राज्य भनिन्छ ।

यसपटक पनि सातवटा स्विङ राज्यले निर्वाचन कस्ले जित्ने भन्ने निर्णय गर्नेछन् । यी स्विङ राज्यहरूको नाम एरिजोना, जर्जिया, मिशिगन, नेभाडा, नर्थ क्यारोलिना, पेन्सिलभेनिया र विस्कन्सिन हुन् ।