काठमाडौं । यसवर्षको तिहार बिदा बिहीबार (आज)देखि सुरु हुँदै छ । कात्तिक १५ देखि १९ गतेसम्म सरकारी बिदा तोकिएको छ ।
 
तिहार बिदामा अधिकांस ठूला अस्पतालका बहिरंग ओपीडी सेवा बन्द रहनेछन् । केहीले ‘हाफ’ ओपीडी सेवा सुचारु गर्ने भएका छन् । 

कुन अस्पतालमा कस्ता सेवा बन्द ? 
काठमाडौं उपत्यकाका अधिकांश ठूला अस्पतालमा तिहार बिदामा ओपीडी सेवा बन्द रहनेछ । वीर, कान्ति, त्रिवी शिक्षण अस्पताल, राष्ट्रिय ट्रमा सेन्टर, पाटन अस्पतालमा कात्तिक १५ देखि १९ गतेसम्म ओपीडी सेवा बन्द रहनेछ । 

यो अवधिमा इमर्जेन्सी र भर्ना भएका बिरामीको (इनपेसेन्ट)सेवा भने सुचारु रहनेछ । परोपकार प्रसूति तथा स्त्रीरोग अस्पतालमा भने आगामी शुक्रबार र सोमबार हाफ ओपीडी खुला रहनेछ । 

यी दिनमा बिहान ७ देखि मध्याह्न १२ बजेसम्म ओपीडी सेवा दिइने अस्पतालले जनाएको छ । ओपीडी सेवाका निम्ति बिहान १० बजेसम्म टिकट लिइसक्नुपर्ने व्यवस्था अस्पतालले गरेको छ । 

यसबाहेक इमर्जेन्सी अन्तरगतका सुम्पूर्ण सेवा सुचारु हुने अस्पतालले जनाएको छ । कात्तिक २० गतेदेखि भने सबै अस्पतालमा नियमित सेवा सञ्चालन हुनेछन् । 

दसैँ तिहारबाहेकका सार्वजनिक बिदामा ओपीडी सेवा सञ्चालन गर्न स्वास्थ्य मन्त्रालयले नयाँ क्यालेन्डर सार्वजनिक गरेको थियो । जसअनुसार २४ वटा सार्वजनिक बिदा निर्धारण गर्दै सर्वसाधारणको सुविधाका निम्ति ओपीडी सेवा सञ्चालन गर्नुपर्ने व्यवस्था गरिएको छ । 

तर, दसैँ र तिहारको बिदामा भने पूर्णरूपमा बन्द गर्न पाइने व्यवस्था छ । प्रधानमन्त्री तथा मन्त्रिपरिषद्को कार्यालयले २०८१ भदौ ७ गते स्वास्थ्य तथा जनसंख्या मन्त्रालयलाई पत्राचार गर्दै सार्वजनिक बिदाका दिनमा समेत ओपीडी सेवा प्रवाह गर्ने व्यवस्था गर्न भनेको थियो ।

सार्वजनिक सेवा प्रवाहसम्बन्धी विशेष व्यवस्थाअनुसार पनि २०८० माघ २९ गते प्रकाशित नेपाल राजपत्रमा पनि बिदाका दिनमा स्वास्थ्य संस्थाहरू सामान्य दिनसरह सबै प्रकारका स्वास्थ्य सेवा सुचारु रहने उल्लेख छ । 

मन्त्रालयले सोहीअुनसार गर्न अस्पतालहरूलाई निर्देशन दिएको थियो । जसअनुसार सबै संघीय अस्पतालहरूले तोकिएका सार्वजनिक बिदामा पनि ओपीडी सेवा प्रवाह गर्दै आएका छन् । 

यस्तै संघीय अस्पतालहरुले दुई सिफ्ट ओपीडी र एक्स्टेन्डेड हेल्थ सर्भिसइएचएसमार्फत सेवा दिँदै आएका छन् ।  

यी सर्वाजनिक बिदामा खुल्छन् सरकारी अस्पतालका ओपीडी  
सरकारले अस्पतालका सम्पूर्ण सेवा सञ्चालन गर्नुपर्ने भनि तोकेका २४ वटा सार्वजनिक बिदा छन् । जसमा पर्व, जात्रा, सार्वजनिक दिवस र जयन्ती पर्ने २४ दिनमा ओपीडी सेवा सञ्चालन हुँदै आएका छन् । 

पर्व बिदा
१.रामनवमी २. चण्डी पूर्णिमा/वैशाख पूर्णिमा उभौली पर्व ३. रक्षाबन्धन ४. श्रीकृष्ण जन्माष्टमी ५. घटस्थापना ६.क्रिसमस डे ७. धान्य पूर्णिमा/उधौली पर्वरयोमरी पुन्ही /ज्यापु दिवस ८. तमु ल्होसार ९.माघी पर्व/माघे संक्रान्ति १०. सोनम ल्होसार ११.महाशिवरात्री १२.ग्याल्पो ल्होसार १३. ईद /ईद उल फित्र १४.वकर ईद/ईद उल अजहा  ।

जात्रा बिदा
१.गाईजात्रा २.इन्द्रजात्रा ३.मत्स्येन्द्रनाथको भोटो देखाउने जात्रा ४.घोडेजात्रा बिदा ।

सार्वजनिक दिवस
१.गणतन्त्र दिवस २.सहिद दिवस ३.राष्ट्रिय प्रजातन्त्र दिवस ४.अन्तर्राष्ट्रिय महिला दिवस ।

जन्मजयन्ती बिदा
१.बुद्ध जयन्ती २.पृथ्वी जयन्ती /राष्ट्रिय एकता दिवस ।