काठमाडौं । समूह चरणको अन्तिम खेलमा आज घरेलु टिम नेपाललाई श्रीलंकाको चुनौती छ । साफ महिला च्याम्पियनसिप–२०२४ मा समूह ‘बी’बाट सेमिफाइनल पुग्ने दुई टोलीको अझै टुंगो लागेको छैन । यो दौडमा छन्, घरेलु टिम नेपालसँगै भुटान र श्रीलंका ।

नेपाल र श्रीलंकाबीचको खेल दशरथ रंगशालामा हुने तालिका छ । खेल बेलुका ५ः३० बजे सुरु हुनेछ ।

तालिकाको शीर्ष स्थानमा रहे पनि नेपाल ढुक्कको स्थितिमा छैन । आजको खेलमा घरेलु टिमविरुद्ध श्रीलंकाले अप्रत्याशित जित निकाले नेपालको सम्भावना समाप्त हुनेछ । त्यसमा अर्को समीकरण पनि छ । नेपालको खेलअघि हुने प्रतिस्पर्धामा भुटानले माल्दिभ्सलाई हराउनुपर्नेछ ।

यही समीकरणका कारण नेपाली टिम आज पक्कै पनि जितको दबाबमा हुनेछ । भुटानले माल्दिभ्सलाई हराउँदा श्रीलंकाविरुद्ध बराबरीमा रोकिए नेपाल समूह उपविजेता बन्नेछ ।

साफको इतिहासमा यसअघिका पाँच संस्करणमा नेपालको समूहमा हुँदा भुटान कहिल्यै समूह विजेता बनेको छैन । नेपालका निम्ति आजको खेल प्रतिष्ठाको लडाइँ समेत बन्ने पक्का छ ।

नेपालको खातामा दुई खेल खेल्दा चार अंक छ । नेपाल पहिलो खेलमा भुटानसँग निराशाजनक बराबरीमा रोकिएको थियो । नेपालले दोस्रो खेलमा माल्दिभ्सविरुद्ध ११–० को जित निकालेको थियो । साफको इतिहासमा नेपालले निकालेको यो दोस्रो सबैभन्दा ठूलो जित हो । नेपालले यसअघि अफगानिस्तानविरुद्ध दोस्रो संस्करणमा १३–० को जित निकालेको थियो ।

समान खेलबाट चार अंक नै जोडेको भुटान गोलआधारमा नेपालभन्दा पछाडि छ । भुटानले दोस्रो खेलमा श्रीलंकाविरुद्ध ४–१ को जित निकालेको थियो ।

दुई खेलबाट तीन अंक जोडेको श्रीलंका पनि अप्रत्याशित नतिजासहित सेमिफाइनल पुग्ने दाउमा छ । श्रीलंकाले माल्दिभ्सविरुद्ध १–० को जित निकालेको थियो । दुई खेल खेल्दा पनि अंकविहीन माल्दिभ्सको भने सेमिफाइनल सम्भावना समाप्त भइसकेको छ ।

साफको इतिहासमा नेपालले हालसम्म श्रीलंकाविरुद्ध हार व्यहोरेको छैन । नेपाल आज पनि यही लय कायम राख्ने लक्ष्यमा छ । तर, केही गुमाउन नरहेको श्रीलंकाविरुद्ध नेपाललाई सहज पक्कै हुने छैन ।

आजको समीकरणबाट समूह विजेता बने नेपालले फाइनल प्रवेशका निम्ति प्रतियोगिताकै सबैभन्दा सफल भारतविरुद्ध खेल्नेछ । यसअघिको संस्करणमा पनि नेपालले भारतलाई नै सेमिफाइनल प्रतिद्वन्द्वी पाएको थियो । उक्त खेलमा नेपाल १–० ले विजयी भएको थियो ।

समूह उपविजेता बने नेपालले साविक विजेता बंगलादेशविरुद्ध प्रतिस्पर्धा गर्नेछ । बंगलादेश त्यही टिम हो, जसले नेपाललाई पछिल्लो संस्करणको फाइनलमा दशरथ रंगशालामै स्तब्ध बनाएको थियो ।