पोखरा । सहकारी ठगी र संगठित अपराधमा पक्राउ परेका राष्ट्रिय स्वतन्त्र पार्टी (रास्वपा)का सभापति तथा पूर्वगृहमन्त्री रवि लामिछाने यतिबेला कास्की हिरासतमा छन् ।

गत शुक्रबार राति पोखरा ल्याइएका लामिछानेलाई प्रहरीले अनुसन्धानका लागि आज (बुधबार) सम्मको म्याद दिएको थियो ।

तर, लामिछाने पक्राउ परेकै दिनदेखि पोखरामा देशका विभिन्न ठाउँबाट आएका रास्वपा नेता कार्यकर्ताहरूले प्रदर्शन र नाराबाजी गर्दै आएका छन् । लामिछाने निर्दोष रहेको र सरकारले फसाएको भन्दै सरकारविरुद्ध पोखरामा दिनहुँ नाराबाजी भइरहेको छ । रास्वपाका पदाधिकारी तथा सांसदहरू नै पोखरामा छन् ।

तर, पोखरामा अपेक्षित साथ नपाएको रास्वपा पछिल्लो समय  घरदैलोतर्फ केन्द्रित हुन थालेको छ । दिनहुँ हुने प्रदर्शनमा पनि नेताहरूले पोखरेलीहरूलाई घरघरबाट निस्केर आन्दोलनमा साथ दिन भनिरहेका छन् । पोखरेली आउँदैनन् कि भनेर नै रास्वपाले निलो पट्टी बाँधेर गर्ने भनिएको प्रदर्शन गरेको छैन ।

प्रतिनिधिसभा सदस्य तोसिमा कार्कीले सोमबारको प्रदर्शनमा रास्वपाको निलो क्रान्ति नभई सरकारविरुद्धको क्रान्ति भएकाले सबै पोखरेलीलाई घरबाट निस्केर आन्दोलनमा सहभागी हुन अपिल गरेकी थिइन् । 

तर, सूर्यदर्शन बचत तथा ऋण सहकारी संस्थाबाट पोखराका १८ हजार ७०० भन्दा धेरै बचतकर्ता बचतकर्ताको रकम गोर्खा मिडिया नेटवर्कमा करोडमा गएको छ । सोही रकम खर्च गरेको आरोपमा रास्वपा सभापति लामिछाने कास्की प्रहरीको हिरासतमा छन् ।

अपेक्षितरूपमा आम सहयोग नपाएपछि रास्वपाले अहिले पोखरालाई १० क्लस्टरमा केन्द्रित गरेर घरदैलोमा पुग्ने नीति लिएको छ ।

सांसद कार्कीले मंगलबार सराङकोटमा स्थानीयसँग तस्बिर खिचाउँदै अन्तर्क्रियात्मक संवाद गरेको सामाजिक सञ्जालमा जानकारी गराएकी छन् ।

“पोखरा सराङकोटसँग अन्तरक्रियात्मक संवाद गरेका छौँ । नागरिक तहको यो निरन्तरको साथ समर्थन र शुभचिन्ता सहितको आशा भरोसा विश्वासलाई सदैव सम्मान गर्ने छौँ,” उनले लेखेकी छ ।

बुधबार पनि उनी पोखराको बैदाम क्षेत्रमा घरदैलो गरेकी छन् । रास्वपाका अनुसार, पार्टी उपसभापति स्वर्णिम वाग्ले पोखराको मासबार क्षेत्रमा घरदैलो गरिरहेका छन् । कार्यवाहक प्रवक्ता मनिष झा छोरेपाटन क्षेत्रमा खटिएका छन् । हरि ढकालले बिरौटा क्षेत्रमा डुलेका थिए ।

अन्य पार्टीहरूले भ्रमहरू छरेको र त्यसको निवारणका लागि नागरिक तहसम्म पुगेको रास्वपाले जनाएको छ ।

“यो देश परिवर्तनका लागि, युवाहरूको आशा, भरोसा कायम गर्नका लागि हामी आन्दोलनमा छौँ, यो व्यक्ति केन्द्रित आन्दोलन हुँदै होइन, राजनीतिक प्रतिशोध साँधेका छन, यिनीहरूलाई खबरदारी गर्नुछ,” कार्कीले भनिन् ।

प्रमाण नभएका कारण लामिछाने छुट्ने भन्दै उनले रास्वपा लामिछानेको पक्षमा आन्दोलन नगरेको जिकिर गरिन् ।