(निबन्धसंग्रह : भीष्म उप्रेती)
नेपाली कविता, निबन्ध र नियात्रा साहित्यमा परिचति सर्जक हुन्, भीष्म उप्रेती । उनको केही समयअघि बजारमा आएको निबन्धकृति हो : ‘जब हामी कुरा गर्छौँ’ ।

साहित्यकार भीष्मका कुल २२ वटा कृति प्रकाशित छन् । यो उनको चौथो निबन्धकृति हो । उनका केही कृति अन्य भाषामा अनुवाद भएका छन् भने उनले पनि विश्वभाषाका केही कृति नेपालीमा अनुवाद गरेका छन् ।

यस पुस्तकको लेखकीयमा भीष्म लेख्छन् : ‘मलाई लाग्छ, सिर्जनात्मक कार्यमा म केवल माध्यम हुँ, लेखाउने अरू नै कोही छ । म त्यस शक्ति वा उर्जाप्रति नतमस्तक एवम् आभारी छु । ...’

कृतिको भूमिकामा डा. माधवप्रसाद पोखरेल लेख्छन् : ‘भीष्म उप्रेतीको निबन्ध रच्ने प्रविधि विचार गर्दा उनी बाहिर (मान्छे, जन्तु, वस्तु) बाट पनि शिक्षा लिन्छन्, भित्रबाट पनि शिक्षा लिन्छन् र निबन्धमा दुइटैलाई साँध्छन् । पूरै इकोसिस्टममा ध्यान दिएर उनी निबन्ध लेख्छन् । ...’

यस निबन्धकृतिभित्र भीष्मका १८ वटा निबन्धहरू समावेश छ । शिखा बुक्सले प्रकाशनमा ल्याएको १३६ पृष्ठको यस कृतिको मूल्य २९५/– रुपैयाँ राखिएको छ ।

०००

काँचुलीका लघुकथा
(लघुकथासंग्रह : मन्जु काँचुली तिवारी)
नेपाली कथा साहित्यमा मन्जु काँचुली तिवारीको आफ्नै स्थान छ । २०१७ सालदेखि नै साहित्य लेखनमा समर्पित काँचुलीको पछिल्लो लघुकथासंग्रह हो : ‘काँचुलीका लघुकथा’ ।

कथा, कविता, नाटक, उपन्याससहित थुप्रै साहित्यिक कृतिहरू प्रकाशनमा ल्याइसकेकी मन्जु काँचुलीको यस लघुकथासंग्रहभित्र कुल ३८ वटा लघुकथाहरू समावेश छ ।

लेखक स्वयम्द्वारा प्रकाशित ९४ पृष्ठको यस लघुकथासंग्रहको मूल्य १८०/– रुपैयाँ राखिएको छ ।

०००

एक पोल्टो बादल
(लघुकथासंग्रह : रेणु अधिकारी ‘मौनता’)
सर्जक रेणु अधिकारी ‘मौनता’ले कविता, गीतलगायतका विधामा कलम चलाउँदै आएकी छन् । केही समयअघि प्रकाशनमा आएको उनको लघुकथासंग्रह हो : ‘एक पोल्टो बादल’ ।

लघुकथाकार अधिकारीका गीतिसंग्रह र कविताकृति पनि प्रकाशित छन् । उनको यो पहिलो लघुकथाकृति हो ।

उनी आफ्नो भनाइमा लेख्छिन् : ‘जीवन जिउने क्रममा आफूले भोगेका, देखेका र सुनेका कुराहरूको सँगालोलाई शब्दरूपी गुच्छाद्वारा मैले त्रिचालिसवटा लघुकथाहरू तयार पारेकी छु । ...’

अक्षरधाम नेपालद्वारा प्रकाशित १०० पृष्ठको यस संग्रहको मूल्य २२५/– रुपैयाँ राखिएको छ ।

०००

अनन्त इच्छाका गीतहरू
(कवितासंग्रह : योगेन्द्र तिमिल्सिना)
कथा, उपन्यास र समीक्षा विधामा कलम चलाउँदै आएका योगेन्द्र तिमिल्सिनाको पहिलो कविताकृति प्रकाशित भएको छ: ‘अनन्त इच्छाका गीतहरू’ ।

यसअघि उनका चार कथाकृति, चार उपन्यास र अन्य केही पुस्तक प्रकाशित भइसकेको छ ।

यस कविताकृतिभित्र तिमिल्सिनाका ४० वटा विभिन्न भावका कविताहरू संग्रह गरिएका छन् ।

ओरिएन्टल पब्लिकेशनद्वारा प्रकाशित ६४ पृष्ठको यस कवितासंग्रहको मूल्य २५०/– रुपैयाँ राखिएको छ ।

०००

चीनका प्राचीन नीतिकथा सँगालो
(नीतिकथा : संकलन— चाङ यओ–ल्वन)
चीनका सर्जक चाङ यओ–ल्वनको संकलन रहेको सन् १९५८मा प्रकाशित पुस्तक ‘चीन की प्राचीन नीति कथाएँ’ बाट नेपालीमा अनुवाद भएको पुस्तक हो ‘चीनका प्राचीन नीतिकथा सँगालो’ । जसलाई हिन्दी भाषाबाट नेपालीमा अनुवाद गरेका छन् डा. चन्द्रमान बज्राचार्यले ।

‘मैले भन्नुपर्ने कुरा’मा अनुवादक डा. चन्द्रमान बज्राचार्य लेख्छन्: ‘यो पुस्तक मैले वि.सं. २०३० वरिपरि अध्ययन गरेको मलाई याद छ । त्यतिखेर नै मैले यो पुस्तक नेपालीमा अनुवाद गरी हरेक नेपाली दाजुभाइ, दिदीबहिनी, साथीसँगीका सामाजिक चेतना उकास्नका लागि नितान्त जरूरी भएको महसुस गरेथेँ र अनुवाद गर्ने अठोट गरिसकेको थिएँ । ...’

प्रस्तावनामा संकलक चाङले लेखेका छन्: ‘चीनको प्राचीन साहित्यमा हामी अत्यधिक नीतिकथाहरू पाउँछौं । यी कथाहरूले सयौँ वर्षदेखि मान्छेको मन र मस्तिष्कमा प्रभाव पारिरहेका छन् । ...’

यस पुस्तकभित्र ६३ वटा छोटाछोटा चीनका प्राचीन नीतिकथाहरू रहेका छन् ।

रत्न पुस्तक भण्डारद्वारा प्रकाशित ७६ पृष्ठको यस पुस्तकको मूल्य १७५/– रुपैयाँ राखिएको छ ।