काठमाडौं । कलाकार तथा निर्माता दीपकराज गिरीले पैसा कमाए पनि आफूहरू खुसी नरहेको बताएका छन् । चलचित्र ‘छक्का पञ्जा–५’बाट पैसा आए पनि आफू र आफ्नो टिम खुुसी नरहेको उनको भनाइ छ ।

“सिनेमा चल्यो । हाम्रो झोलीमा पैसा पनि आयो । तर हामी खुसी छैनौँ,” शुक्रबार पत्रकार सम्मलेन गर्दै दीपकले भने, “हामीले जित्यौँ, हामीसँगै आएको अर्को सिनेमा (१२ गाउँ)ले पनि कमायो । उसले पनि जित्यो । तर, समग्र नेपाली चलचित्र उद्योगले हार्यो भने के हुन्छ ?” 

नेपाली चलचित्र उद्योगमा नकारात्मक संस्कारको विकास भएको उनको भनाइ छ । नकारात्मक प्रवृत्ति विकास स्वयं चलचित्रकर्मीहरूले नै गरेको उनको भनाइ छ । “यो नेगेटिभिटीको विकास अरुले गरेको होइन । हामी चलचित्रकर्मीले नै गरेका हौँ । यसको भागिदार म पनि हुँला,” उनले भने, “जसको कमजोरी भए पनि हामीले यो प्रवृत्ति हटाउनुपर्छ ।” 

आफ्नो चलचित्रको प्रचार नेगेटिभिटीका कारण पनि धेरै गर्न नपाएको उनको भनाइ छ । “छक्का पञ्जा–५ को प्रचार सामग्रीमा पसेर एउटा चलचित्र हेरौँ, अर्कोलाई बहिष्कार गरौँ भनेर गाली आउँछ,” दीपक अगाडि भन्छन्, “फलानो चलचित्र जिन्दाबाद, फलानो चलचित्र मुर्दाबाद भनिरहेका छन् । यो राम्रो होइन ।” एकले अर्कोलाई शुभकामना दिनसक्नुपर्नेमा अस्वस्थ प्रतिस्पर्धा भइरहेको उनको भनाइ छ । यद्यपि, बिराज भट्टसँग आफ्नो पनि कुरा नभएको उनी बताउँछन् । 

अस्वस्थ प्रतिस्पर्धा भइरहेको भन्दै उनले एकले अर्कोलाई सम्मान गर्नसक्नुपर्नेमा जोड दिए । 

चलचित्रका समाचार र जानकारी आउनु स्वभाविक भए पनि अहिले चुनावी परिणाम आएजस्तो भइरहेको उनको भनाइ छ । कसले कति कमायो, कसको कति शोजस्ता कुरामा प्रतिस्पर्धा भइरहेको भन्दै उनले असन्तुष्टि जनाए । 

‘छक्का पञ्जा–५’ राम्रो छ भनेर भन्नेलाई गाली गर्ने, फेसबुकको पोस्ट डिलिट गराउन फोन आउनेजस्ता क्रियाकलाप गलत भएको दीपक बताउँछन् । अष्ट्रेलियामा ‘छक्का पञ्जा’ हेर्न नजाऊ भनेर फोन आउने गरेको भन्दै आफूलाई वितरकको फोन गरेको उनले जानकारी दिए । 

दीपकले आफूहरूले चलचित्र छायांकन गरेको गाउँ नै बाढीले बगाएको भन्दै तिहारपछि आफैँ गएर आर्थिकसँगै भौतिक सहयोग गर्ने बताए । “हामीले जहाँ सुटिङ गर्यौं त्यहाँको गाउँ नै बगाएको छ,” उनले भने, “केही समयपछि हामी त्यहाँ गएर आर्थिक सहयोगसँगै पुनर्निर्माणमा पनि जुट्ने छौँ । मन खोलेर ठूलै सहयोग गर्नेछौँ ।”

उनले ‘छक्का पञ्जा–५’को अघिल्ला सिरिजहरूभन्दा धेरै ओपनिङ रहेको बताए । पहिलो हप्ताको कलेक्सन पनि यसअघिका सिरिजको भन्दा धेरै रहेको उनको भनाइ छ । 

दीपकले नामै नलिई समीर भट्टको आगमनको स्वागत गर्दै शुभकामना पनि दिए ।