काठमाडौं । किर्ते नागरिकता प्रकरणमा पक्राउ परेका जिल्ला प्रशासन कार्यालय धादिङका नायब सुब्बा कृष्णप्रसाद थपलियासहित ६ जनाको मुद्दा अदालत पुगेको छ । उनीहरू तिब्बती नागरिकलाई किर्ते नागरिकता बनाइदिएको आरोपमा पक्राउ परेका थिए । 

उपत्यका अपराध अनुसन्धान कार्यालयले असोज ६ गते बौद्धको फूलबारीमार्गस्थित पुष्पा लामाको घरबाट अनलाइन जुवा खेल्ने समूहलाई पक्राउ गरेको थियो । उनीहरूमध्ये एकजना तिब्बती मूलका नागरिकसँग नेपाली नागरिकता भेटिएपछि प्रहरीले अनुसन्धान थालेको थियो ।

पक्राउ परेकामध्ये तिब्बती मूलका सोनाम तामाङ भनिने सोनामको नागरिकता धादिङबाट जारी गरिएको थियो । उनको नागरिकता किर्ते रहेको आशंकापछि उनीमाथि छुट्टै अनुसन्धान थालिएको थियो ।

उनको किर्ते नागरिकता बनाउने गिरोहमा धादिङको खनियाबास गाउँपालिका–५ का रामेश्वर रिजाल, धादिङकै नेत्रावती डबजोङ गाउँपालिका–१ का मदन तामाङ, सिन्धुपाल्चोकको हेलम्बु गाउँपालिका–१ का छिरिङ वाङदिङ शेर्पा र बौद्धमा बस्दै आएका तिब्बती मूलका छिरिङ ढुङडुपको संलग्नता देखिएको थियो ।

उनीहरूलाई कार्यालयका डीएसपी रोशन खड्काको टोलीले पक्राउ गरेर थप अनुसन्धानका लागि धादिङ पठाएको थियो । धादिङ प्रहरीले थप दुईजनालाई पक्राउ गरेको हो ।

पक्राउ परेका ६ जनामाथिको अनुसन्धान सकेर धादिङ प्रहरीले अनुसन्धान प्रतिवेदन जिल्ला सरकारी वकिल कार्यालय बुझाइसकेको छ । सुब्बा थपलियासहितको समूहले सोनाम तामाङसँग चार लाख रुपैयाँ लिएर नागरिकता बनाएर काठमाडौं पुर्‍याएको खुलेको छ । 

जुवाखालबाट समातिएकामाथि अनुसन्धान गर्दा खुल्यो किर्ते नागरिकता