काठमाडौं । साफ महिला च्याम्पियनसिपको उद्घाटन खेलमा भारतले पाकिस्तानविरुद्ध पहिलो हाफमा ४–१ को अग्रता बनाएको छ ‌। बिहीबार त्रिपुरेश्वरस्थित दशरथ रंगशालामा जारी खेलमा भारतका लागि ग्रेस डाङ्मेई, मनिषा, बालादेवी गान्गोमले गोल गरिन् । पाकिस्तानकी सुहा हिरानीले गोल फर्काइन्‌ ‌। 

खेलको सुरुवातदेखि नै पाकिस्तानी रक्षापंक्तिमाथि दबाब बनाएको भारतले पाँचौँ मिनेटमा नै अग्रता बनाएको थियो । भारतकी ग्रेसले १८ यार्ड बक्सबाट गोल गर्दै प्रतियोगिताको सबैभन्दा सफल टिमलाई अग्रतामा राखेकी हुन् । 

पहिलो गोल गरेको १२ मिनेटपछि भारतले अग्रता दोब्बर बनायो । १७औँ मिनेटमा पाकिस्तानी रक्षकबाट भएको गल्तीको फाइदा उठाउँदै मनिषाले भारतको अग्रता दोब्बर बनाइन् । 

३५औँ मिनेटमा भारतले अग्रतालाई ३–० मा पुर्‍यायो । पाकिस्तानको पेनाल्टी क्षेत्रबाट पाएको इन्डाइरेक्ट फ्री किकलाई सदुपयोग गर्दै बालादेवी गान्गोमले भारतको अग्रतालाई ३–० मा राखिन् । भारतबाट बालादेवीको यो ५०औँ अन्तर्राष्ट्रिय गोल हो ।

खेलको ४२औँ मिनेटमा भारतले अग्रतालाई ४–० मा पुर्‍यायो । पहिलाको इन्जुरी समयमा पेनाल्टी पाएपछि पाकिस्तानले गोल फर्कायो । पाकिस्तानकी फरवार्ड नदिया खानलाई भारतीय कप्तान असलता देवीले पेनाल्टी बक्सभित्र लडाएपछि पाकिस्तानले पेनाल्टी पाएको थियो ‌। जसमा चुहाले कुनै गल्ती गरिनन् ।

पहिलो हाफभर भारतले करिब आधा दर्जनभन्दा धेरै गोलका अवसर सिर्जना गरेको थियो । पहिलो हाफको अधिकांश समय रक्षापंक्तिमा बिताएको पाकिस्तानले भने पेनाल्टीबाहेक अरू उत्कृष्ट अवसर सिर्जना गर्न सकेन ।

प्रतियोगितामा भारत समूह 'ए'मा छ ‌। यस समूहमा भारत र पाकिस्तानसँगै साविक विजेता बंगलादेश छन् । यस्तै, समूह 'बी'मा साविक उपविजेता नेपालसँगै माल्दिभ्स, श्रीलंका र भुटान छन् ।

नेपालले आफ्नो पहिलो खेलमा शुक्रबार भुटानसँग खेल्ने छ ।

तस्बिरहरू : हरिशजंग क्षेत्री/बाह्रखरी