धरान उपमहानगरपालिकाका प्रमुख हर्क साम्पाङले उपप्रमुख हुँदाहुँदै वडा अध्यक्षलाई कार्यवाहक दिएर कहीँ नभएको जात्रा देखाएका छन् । प्रचलित कानुन तथा परम्पराविपरीत कार्यवाहक प्रमुख तोकेपछि प्रमुख साम्पाङको कार्यशैली र क्षमतामा पनि प्रश्न उठेको छ ।

स्थानीय सरकार सञ्चालन ऐन, २०७४ को दफा १२ मा पालिकाका अध्यक्ष वा प्रमुख ७ दिनभन्दा बढी कार्यालयमा अनुपस्थित रहने भएमा उपाध्यक्ष वा उपप्रमुखलाई कार्यवाहक दिनुपर्ने स्पष्ट व्यवस्था छ । यस्तै उपाध्यक्ष वा उपप्रमुख पनि अनुपस्थित भएमात्र अरू कुनै सदस्यलाई कार्यवाहक दिन सकिने प्रावधान पनि ऐनमा रहेको छ । 

स्वतन्त्र उमेदवारी दिएर निर्वाचित प्रमुख साम्पाङमा सुरुदेखि नै अलोकतान्त्रिक प्रवृत्ति देखिएको थियो । सामाजिक सञ्जालमा उनका टिप्पणीहरू उपमहानगरपालिका प्रमुख सुहाउँदा थिएनन् । तर, उनले स्थानीय जनतालाई श्रमदान गर्न उत्प्रेरित गरेर धरानमा खानेपानी आपूर्तिका लागि गरेको प्रयास भने सराहनीय थियो । 

प्रमुख साम्पाङको यही कामले उनका अलोकतान्त्रिक अवगुणहरू ढाकिएका थिए । उपमहानगरपालिकामा निर्वाचित जनप्रतिनिधिहरू साम्पाङको वचन र व्यवहार दुवैप्रति रुष्ट भए पनि उनलाइ खासै अप्ठेरो पारेका थिएनन् । तर, यसपटक त उनले वैधताको ‘लक्ष्मणरेखा’ नै पार गरेका छन् । 

उपप्रमुख हर्क साम्पाङले तजबिजमा नियुक्त गरेका प्रतिनिधि होइनन् । प्रमुख र उपप्रमुख दुवै एकै दिन उनै मतदाताले उही विधि र प्रक्रियाबाट निर्वाचित हुनेहुन् । यसैगरी उनीहरूको काम कर्तव्य र अधिकार पनि कानुनबाटै निर्धारित गरिएको छ । यसैले उपप्रमुखको सट्टा अर्को सदस्यलाई कार्यवाहक तोक्नु गैरकानुनी बहुलट्ठी हो ।    

प्रमुख मेयरलाई पनि कार्यपालिकाको अध्यक्षता गर्नेदेखि सबै अधिकार कानुनले नै दिएको हो । उनले कानुनको मर्यादा नराख्ने हो भने कानुनले दिएको अधिकार प्रयोग गर्ने नैतिक वैधता पनि हुँदैन । कानुनको यसरी नै उपेक्षा गर्ने हो भने उपप्रमुखले कार्यालय कब्जा गरे पनि साम्पाङको विरोध गर्ने नैतिक शक्ति हुँदैन ।

भन्छन् - धर्मो रक्षति रक्षितः । अर्थात्, रक्षा गरिएमात्र धर्मले पनि रक्षा गर्छ । कानुनका हकमा पनि त्यही नियम लागु हुन्छ । आफूले पालना गरेमात्र कानुनले पनि रक्षा गर्छ । यसैले धरान उपमहानगरपालिकाका प्रमुख हर्क साम्पाङले लोकतान्त्रिक विधि र प्रक्रियाको मर्यादा नगर्ने आफ्नो प्रवृत्ति सच्याउनु उचित हुनेछ । कानुन मिच्ने प्रवृत्ति अन्ततः उनकै लागि प्रत्युत्पादक हुनसक्छ ।