काठमाडौं । दसैँको फूलपातीको अवसर पारेर तीन सिनेमा रिलिज हुँदै छन् । ‘ज्वाइँ साब’, ‘१२ गाउँ’ र ‘छक्का पञ्जा–५ एकैदिन रिलिज हुन लागेका हुन् । यी चलचित्रका निम्ति क्यूएफएक्सलगायत केही मल्टिप्लेक्सले शो पनि बाँडफाँट गरिसकेका छन् ।

कमेडीमा ब्रान्ड बनिसकेको ‘छक्का पञ्जा’को पाँचौँ सिरिज र एक्सन नायक बिराज भट्टको चलचित्र ‘१२ गाउँ’सँग भिड्न आइपुगेको ‘ज्वाइँ साब’ पनि यति बेला चर्चामा छ । यो चलचित्रको मुख्य भूमिकामा जितु नेपाल छन् । उनीसँग राखिएका केही जिज्ञासा–

रिलिजको संघारमा ‘ज्वाइँ साब’ आइसकेको छ, कस्तो प्रतिक्रिया आइरहेको छ ?
पछिल्लो समय सामाजिक सञ्जालकै प्रतिक्रिया हेर्ने हो । दर्शकले एकदम राम्रो भनिरहनुभएको छ । सकारात्मक माहोल बनेको छ । पोस्टर, टिजर, ट्रेलर र गीतबाटै प्रचार हुने हो । यसमा दर्शकले राम्रो प्रतिक्रिया दिइरहनुभएको छ । प्रतिक्रियाले हामी उत्साही छौँ ।

कसरी गरिरहनुभएको छ प्रचारप्रसार ?
दसैँ र प्राकृतिक प्रकोपका कारण काठमाडौंबाहिर जान सकेनौँ । काठमाडौंभित्रै बसेर प्रचारप्रसार गरिरहेका छौँ । विभिन्न कार्यक्रममा गएर आफ्ना कुरा राखिरहेका छौँ । मिडियामा अन्तर्वार्ता गरिरहेका छौँ ।

गीत, टिजर, ट्रेलर र पोस्टरबाट पनि दर्शकसम्म पुग्ने प्रयास गरिरहेका छौँ । गीत र ट्रेलरले माहोल राम्रो बनेको छ । दर्शकले रुचाइदिनुभएको छ ।

पछिल्लो समय हाम्रो चलचित्रको एउटा क्लिप्स लिक भयो । एयरपोर्टमा खिचिएको त्यो क्लिप्सले पनि राम्रै गर्‍यो ।

त्यो क्लिप्स लिक भयो कि निर्माणपक्षले योजनाबद्ध रूपमा सार्वजनिक गरेको हो ?
होइन होइन, लिक भएकै हो । हामीले किन सार्वजनिक गर्थ्यौँ र ? तर, लिक भएको क्लिप्सले पनि राम्रै गर्‍यो । धेरै दर्शकलाई त्यसले सिनेमाप्रति कौतूहल सिर्जना गरेको छ ।

‘ज्वाइँ साब’सँगै अरू दुई लिजेन्डका सिनेमा पनि आउँदै छन्, ‘छक्का पञ्जा–५’ र ‘१२ गाउँ’को चेपुवामा पर्ने कत्तिको सम्भावना छ ? 
उहाँहरू लिजेन्ड हो । मैले त पहिला ‘छक्का पञ्जा’ र ‘१२ गाउँ’ हेर्नेु अनि मेरो चलचित्र हेर्नु भनेर भनिरहेको छु । सबै चलचित्रका आ–आफ्नै दर्शक हुन्छन् । आफ्नो रोजाइअनुसार दर्शक सिनेमा हेर्न जाने हो । सबैको विषयवस्तु आ–आफ्नै हुन्छ, जसलाई जुन विषय मन पर्छ त्यही हेर्ने हो । त्यसैले डर लागेको छैन । उत्साहीचाहिँ छु ।

दर्शकको प्रतिक्रियाले पनि डर लागेको छैन । सबैको आफ्नै दर्शक हुनुहुन्छ भन्ने मेरो बुझाइ छ ।

शो बाँडफाँट भइसकेको छ, कत्तिको सन्तुष्ट हुनुहुन्छ ?
मैले हेरेको त छैन, तर सुनेको छु । क्यूएफएक्स, आईएनआईले जति शो दिनुभएको छ, म एकदम खुसी छु । सन्तुष्ट छु ।

केही न केही हेरेरै शो बाँडफाँट हुने हो । शो धेरै पाएर दर्शक आउनु भएन र खाली भयो भने त्यसको केही अर्थ हुँदैन । पाएकै शो हाउसफुल भएर दर्शकको ओभरफ्लो भयो भने शो थपिन्छ । त्यसैले यसमा मेरो कुनै गुनासो छैन ।

‘छक्का पञ्जा’को म्याटरमा घुसेर आफ्नो प्रचार गर्दै उसलाई गाली गरेको आरोप तपाईं र ‘१२ गाउँ’लाई लागेको छ नि ?
अरूको कुरा मलाई थाहा भएन, तर मैले र हाम्रो टिमले त्यसो गरेको छैन । गर्नु हुँदैन भन्ने मेरो मान्यता हो । कसैले गरिरहेको छ भने त्यो गलत हो ।

दुईवटा चलचित्रसँगै ‘ज्वाइँ साब’ आउन लागेको  छ । दुईवटै चलचित्र ठूलो ब्यानरका हुन् । हाम्रो चलचित्र त ऋणैऋणमा बनेको चलचित्र हो । यो चलचित्र मेरो काँधमा रहेकाले मेरो नाम पनि आएको होला, यसमा म संलग्न छैन । मेरो टिमले पनि यस्तो गरेको छैन । हामी सबै मिलेर जानुपर्छ भन्ने मान्छे हो म ।

मैले मेरो पनि मात्रै चलचित्र हेरिदिनु भनेर पनि आजसम्म भनेको छैन । सामाजिक सञ्जाल वा कुनै अन्तर्वार्ता हेरे हुन्छ, कतै कसैलाई गाली गरेको छैन । दुईवटा सिनेमा हेरेर मेरो सिनेमा हेरिदिनु भनेर भन्ने व्यक्ति हुँ म ।

‘छक्का पञ्जा’ भएकैले आज म ‘ज्वाइँ साब’ भएको छु । ‘छक्का पञ्जा’ हुँदैन थियो भने म ‘ज्वाइँ साब’ हुन्न थिएँ भन्ने मलाई राम्रोसँग थाहा छ । त्यसैले उहाँहरूलाई गाली गर्ने कुरै भएन । हाम्रै चलचित्रको गीत, ट्रेलर र पोस्टहरूमा पनि ‘१२ गाउँ’ हेरौँ भनेर लेखेको देखिन्छ । कसले यस्तो गरिरहेको थाहा भएन, तर जसले गरिरहेको छ – गलत हो । 

यस्तो कमेन्टको असर हलमा पर्छ होला ?
चलचित्र हेर्ने दर्शक आरामले घरमा बसिरहनुभएको छ । ‘छक्का पञ्जा’ पारिवारिक सिनेमा हो, ३०÷३५ जना सँगै गएर टिकट काटेर हेर्ने चलचित्र हो । हाम्रो पनि त्यस्तै पारिवारिक चलचित्र हो । ‘ज्वाइँ साब’ रमाइलो गर्दै परिवारसँग बसेर आनन्द लिएर हेर्न चलचित्र हो । हामीले पनि त्यही नै अपेक्षा गरेका छौँ । सिनेमाअनुसारका दर्शक हुन्छन् भन्ने बिर्सिनु हुँदैन ।

‘ज्वाइँ साब’को गीत र ट्रेलर हेर्दा कतै साह्रै सस्तो कमेडी त छैन भन्ने अनुमान लगाउन सकिन्छ नि !
छैन छैन । गीतमा विवाहको प्रसंगमा म नीतिको ठाउँमा र नीति मेरो ठाउँमा थोरै विषयप्रसंगले आउने मात्रै हो । सबै सिनेमाभर त्यस्तो छैन । कमेडी छ, तर सिचुएसनल छ । दर्शकले पचाउनै नसक्ने अपाच्य र भद्दा मजाकवाला सिन छैन । पारिवारिक सिनेमा हो ।