काठमाडौं । निर्देशक तुलसी घिमिरेले बनाउन लागेको नयाँ चलचित्र ‘पहाड’को एक गीतमा अभिनेता विपीन कार्कीले आफ्नो स्वर दिएका छन् ।  

आइतबार विपीनले पहाडको एक गीतमा र्‍याप भरेका हुन । गीतकार रञ्जित गजमेरको संगीतमा विपीनले ‘पहाड’का लागि र्‍याप गीत गाएका हुन् । यसअघि विपीनले चलचित्र ‘छड्के’का लागि गीत गाएका थिए । 

गीतलाई निर्देशक घिमिरेले लेखेका हुन् । घिमिरेका अनुसार यो गीतमा भारती घिमिरे र अन्य एक गायकको पनि स्वर रहनेछ । 

तिहारपछि छायांकनमा निस्किने पहाडमा विपीन कार्कीसँगै मदनकृष्ण श्रेष्ठ, सुनील थापालगायत कलाकारको अभिनय रहनेछ । चलचित्रमा सप्राइजका रूपमा अर्का एक चलेका अभिनेता र एक नव अभिनेत्रीको आगामन पनि हुने निर्देशक घिमिरेले बताएका छन् ।

५० प्रतिशत नेपालका विभिन्न पहाडी भेगमा छायांकन हुने चलचित्रको बाँकी सुटिङ भने मुम्बईमा हुनेछ । प्रि–प्रोडक्सनको अन्तिम चरणमा रहेका निर्देशक घिमिरेलेलाई प्रोडक्सन डिजाइनर भएर जेठी छोरी भावनाले सघाइरहेकी छिन् ।