काठमाडौं । ललिपुरका एक व्यवसायीलाई ‘हनी ट्रयाप’मा पारेर ३० लाख रुपैयाँ असुल गरेको समूहले उक्त शैली पटक–पटक अपनाएको पाइएको छ । त्यस्तै शैली अपनाएर उक्त समूहले अरू व्यवसायीबाट समेत मोटो रकम असुल गरेको तथ्य खुलेको हो ।

जिल्ला प्रहरी परिसर ललितपुरको टोलीले पक्राउ गरेर हाल अनुसन्धान गरिरहेका इटहरीका ताज स्लाम र इटहरीकै दर्शन पोखरेलले युवतीको प्रयोग गरी हनी ट्रयापमा पारेर रकम असुल गर्ने धन्दा चलाएको खुलेको छ । दर्शन फरार छन् । ताजलाई प्रहरीले यही असोज ९ गते पक्राउ गरेको थियो ।

ताज र दर्शनको समूहले इटहरीमा केही युवतीलाई अवैध यौनधन्दामा लगाउने र पछि उनीहरूलाई नै प्रयोग गरेर बलात्कारको उजुरी दिने भन्दै विभिन्न व्यक्तिबाट मोटो रकम असुल गर्ने गरेको खुलेको हो । व्यवसायीलाई हनी ट्रयापमा पार्न युवतीलाई विभिन्न माध्यमबाट सम्पर्क गर्न लगाउने र शारीरिक सम्बन्ध भएपछि रकमको ‘बार्गेनिङ’ गर्ने गरेको खुलेको छ ।

यही शैली अपनाएर उनीहरूले ललितपुरका व्यवसायीबाट ३० लाख रुपैयाँ असुल गरेका थिए । जग्गा कारोबार गर्ने ती व्यवसायी गएको साउनमा इटहरी पुगेका थिए । इटहरीमा पोखरेलको समूहमार्फत त्यहाँकी सुष्मा विकसँग उनको भेट भएको थियो । पछि ती व्यवसायी र विक धरानको भेडेटारसहितका ठाउँमा एकसाथ घुमघाम गरेका थिए ।

असोज पहिलो साता ललितपुर फर्किएका उनलाई ताज, दर्शन र सुष्मासहितको समूह मिलेर बलात्कारको उजुरी दिने भन्दै प्रहरी नै प्रयोग गरी ३० लाख असुल गरिएको थियो । त्यसका निम्ति उनीहरूले सुरुमा इटहरीकै प्रहरी प्रयोग गर्ने योजना बनाएका थिए ।

तर, इटहरीका प्रहरीलाई प्रयोग गर्न सकेनन् । त्यसपछि ललितपुरको भैँसेपाटी प्रहरी प्रभागकी इन्स्पेक्टर विनुकुमारी शाहीलाई प्रयोग गरे । बलात्कार भएको भनिएको ठाउँ धरान थियो । तर, रकम असुल्ने नियतले इन्स्पेक्टर शाहीलाई समेत आर्थिक प्रलोभन देखाएर ती व्यवसायीलाई गैरकानुनी तरिकाले भैँसेपाटीमा बोलाएर ३० लाख रुपैयाँ तिराइएको थियो ।

असोज ६ गते छलफलका निम्ति भन्ने निवेदन दिन लगाएर बलात्कारजस्तो जघन्य अपराधमा फसाइदिने भन्दै ६० लाख रुपैयाँ मागिएको थियो । पछि बार्गेनिङ हुँदै प्रहरी प्रभागभित्रै ३० लाखमा सहमति गरिएको थियो ।

सोही दिन व्यवसायीले सात लाख दिएका थिए । अर्को दिन उनले आफ्नो गाडी बेचेर थप २३ लाख रुपैयाँ बुझाएका थिए । गाडी समेत भैँसेपाटी प्रभागभित्रै राखेर बिक्री गरिएको खुलेको छ ।

हनी ट्रयापिङ समूहसँग इन्स्पेक्टर शाहीको समेत मिलोमतो देखिएपछि गृह मन्त्रालयले उनलाई निलम्बनमा गरिसकेको छ । प्रहरी प्रधान कार्यालयको सिफारिसमा गएको शुक्रबार शाहीलाई मन्त्रालयले निलम्बन गरेको हो ।

३० लाख रकम असुल गर्ने गिरोहमा आबद्ध आरोपमा एक अर्की महिलालाई पनि पक्राउ गरिएको छ । इटहरीकै २० वर्षीया भीमादेवी थापालाई पक्राउ गरिएको हो । उनीमाथि प्रहरीले थप अनुसन्धान जारी राखेको छ । ललितपुरका व्यवसायीको ३० लाखमध्ये २० लाख थापाको बैंक खातामा जम्मा गरिएको खुलेपछि उनलाई पक्राउ गरिएको प्रहरीले जानकारी गराएको छ ।

दरबारमार्गको बलात्कार घटनाको पनि जोडिए ताज
यही गिरोहले गएको वर्षको जेठमा दोखलाका निर्माण व्यवसायी विदुर शर्मालाई समेत हनी ट्रयापमा पारेर १६ लाख रुपैयाँ असुल गरेको पत्ता लागेको छ ।

सुरुमा विदुरसँग एक करोड रुपैयाँ मागिएको थियो । एक करोड नदिएपछि उनीमाथि बलात्कारको उजुरी दिइएको प्रहरीको अनुसन्धानका क्रममा खुलेको छ ।

पछि एक करोड रुपैयाँ दिने सर्तसहित विदुरका आफन्तले नबिल बैंकमा रहेको ताज स्लामको खातामा १६ लाख रुपैयाँ जम्मा गरेका थिए । १६ लाख पाएपछि पीडित भनिएकी युवतीले उजुरी फिर्ता लिन दरबारमार्ग प्रहरीमा निवेदन दिएकी थिइन् । तर, बलात्कारको उजुरी फिर्ता लिन नमिल्ने र छलफल समेत गराउन नपाइने भएपछि विदुर फरार भएका थिए ।

उनीमाथि बलात्कारको उजुरीमा प्रहरीले काठमाडौं जिल्ला अदालतबाट पक्राउ पुर्जी लिइसकेको छ । उनी अझै फरार छन् ।

रानीपोखरीस्थित उपत्यका प्रहरी कार्यालयकी प्रमुख किरण बज्राचार्यले दरबारमार्ग र भैँसेपाटीको उजुरी एउटै प्रकृतिको र मानिस समेत उही भएकाले उनीहरूले युवतीलाई प्रयोग गरेर हनी ट्रयापमा पार्ने र रकम असुल्ने धन्दा चलाएको बताइन् ।

“हामी यो केसमा अलि गहिराइमा पुग्ने गरी अनुसन्धान गर्दै छौँ । यो गिरोहले इटहरीमा युवतीहरू राखेर हनी ट्रयापको शैली अपनाएर काम गरेको देखिन्छ । थप अनुसन्धान गर्दै छौँ,” एआईजी बज्राचार्यले भनिन् ।

यो समूहले केही पत्रकारलाई समेत ‘टार्गेट’ गरेको खुलेको छ । ललितपुर प्रहरीका अनुसार, त्यसका निम्ति ताज समूहकी एक युवतीले पत्रकारलाई ह्वाट्सएपमार्फत फोन पनि गरेको देखिएको छ । प्रहरी अधिकारीविरुद्धको समाचार दिने भन्दै युवतीमार्फत सम्पर्क गर्न लगाउने र पछि हनी ट्रयापमा पार्ने योजना ताजको समूहको थियो ।

ती युवती विदुरविरुद्ध उजुरी हाल्ने व्यक्ति नै रहेको खुलेको छ । ताजसँग जोडिएका एक बहालवाला एसपीको भूमिका समेत शंकास्पद देखिएको छ । उनै एसपीमार्फत ताज भैँसेपाटीकी इन्स्पेक्टर शाहीको चिनजानमा पुगेको प्रहरी अधिकारीको दाबी छ ।

ताज भैँसेपाटी जाँदा ती एसपीसँग असोज ६ गते तीनपटक फोन सम्पर्क गरेको देखिएको छ । त्यसपछि मात्र इन्स्पेक्टर शाहीसँगको ‘कनेक्सन’ देखिन्छ । प्रहरी प्रधान कार्यालयले एसपीको भूमिका समेत शंकास्पद देखिएपछि छानबिन गर्ने तयारी गरेको छ ।

उनीहरूले विशेष गरी प्रतिष्ठित व्यवसायीलाई टार्गेट गर्ने गरेको खुलेको छ । अरू व्यवसायीलाई समेत उनीहरूको समूहले पीडित बनाएको आशंका प्रहरीले गरेको छ । भैँसेपाटी घटनाको छानबिन गर्न ललितपुर प्रहरीका डीएसपी नरहरि अधिकारीको नेतृत्वमा समिति बनाइएको छ ।

छानबिन समितिले बोलाउँदा गइनन् शाही
भैँसेपाटीकी इन्स्पेक्टर शाहीको भूमिकामाथि छानबिन गर्न गठित समितिले बोलाउँदा समेत उनी उपस्थित भएकी छैनन् । शुक्रबार गृह मन्त्रालयले निलम्बन गर्नुभन्दा अघि दुईपटक समितिले उनको भूमिकाबारे सोधपुछ गर्न ललितपुरमा बोलाएको थियो । तर, उनी त्यहाँ गइनन् ।

ललितपुरका व्यवसायीका आफन्तले भीमादेवीको खातामा रकम पठाउँदा शाहीकै निर्देशनानुसार भैँसेपाटीकै एक प्रहरी समेत त्यो जम्मा गर्न बैंकमा पुगेको अनुसन्धानका क्रममा खुलेको स्रोतको भनाइ छ ।