काठमाडौं । निश्चल बस्नेत कलाकार मात्रै होइनन्, निर्देशक पनि हुन् । कलाकारभन्दा पनि निर्देशकका रूपमा उनको नाम अगाडि आउँछ । तर उनले अभिनय र निर्देशन दुवैलाई ब्यालेन्स गर्दै अगाडि बढाइरहेका छन् । 

एक दिन सजन काफ्ले र आकाश बराल निश्चलसँग आएर प्रस्ताव  लगानी गर्न प्रस्ताव गरे । उनीहरूले भने– हामीसँग सिनेमाको स्क्रिप्ट छ । निर्देशन हामी आफैँ गर्छौं । तपाईंले लगानी गरिदिनुपर्‍यो । 

निर्देशकसँगै आएर सजन र आकाशले निश्चललाई लगानी गरिदिन आग्रह गर्दैथिए । त्यो पनि निर्देशन आफैँ गर्ने सर्तमा । 

निश्चलले सिनेमा पढ्दा नै टेक्स्ट बुकमा पढेका हुन्, सिनेमा किन बनाउने ? आफैँले चलचित्र बनाउँदा पनि ‘म यो सिनेमा किन बनाउँदै छु’ भनेर आफैँले आफैँलाई सोध्छन् । 

आफैँले आफैँलाई त सोध्ने प्रश्न अरुलाई नसोध्ने कुरै भएन । उनले सोधे– यो सिनेमा किन बनाउन लागेको र मैले किन लगानी गर्ने ? 

सजन र आकाशको जवाफमा निश्चल कन्भिन्स भए । त्यसपछि बाँकी रह्यो निर्देशनमा उनीहरूलाई किन विश्वास गर्ने ? त्यसमा पनि उनीहरूले निश्चललाई कन्भिन्स गरे । 

“उनीहरूले भनेको कुरामा म कन्भिन्स भएँ । यी–यी कारण हामी ह्यान्डल गर्न सक्छौँ भने । मैले विश्वास गरेँ । बीचमा अफ्ठ्यारो पर्दा ह्यान्डल गर्ने म पनि छँदै छु भन्ने लाग्यो,” निश्चल भन्छन्, “त्यसपछि हामी बेहुली फ्रम मेघौलीमा लगानी गर्न तयार भयौँ ।” 

‘बेहुली फ्रम मेघौली’मा निश्चलको क्यारेक्टर अष्ट्रेलिया रिटर्न्स युवकको हो । ऊ विदेशबाट फर्किएपछि विवाह गर्ने सोचमा हुन्छ । त्यहीबीचमा मीना (स्वतस्तिमा खड्का)सँग भेट हुन्छ । एकले अर्कालाई व्यक्तिगत रूपमा बुझिरहेका बेला के–कस्ता घटना घट्छन् । त्यही अवस्थाबाट कथा अगाडि बढ्ने निश्चलले बताएका छन् । 

छोरीको उमेर २९ वर्ष पुग्दा परिवार, समाज र आफन्तलाई उसको विवाहलाई लिएर तनाव हुन्छ । तर निश्चल विदेशबाट फर्किएको केटा भएकाले धेरै कुरा आफैँ मिलिरहेको छ । नमिल्ने कुरा पनि विदेशबाट आएको केटा भनेपछि आफैँ मिलिरहेको कथा चलचित्रमा निश्चलले निभाएको निश्चल बताउँछन् । 

“यही कथालाई रमाइलो तरिकाले देखाइएको छ । सिचुएसनल कमेडी छ । कमेडी गर्नका लागि कमेडी गरिएको छैन । अरुको सुख र दुःख दुवैमा दर्शक हास्नुहुन्छ,” निश्चल भन्छन्, “कमेडी भन्नबित्तिकै हाम्रो चलचित्र फुल अन कमेडी होइन । कथा भन्दै जाँदा हासो सिर्जना हुने हो ।”  

नेपाली समाजमा ३० वर्षको आसपासमा पुगेपछि विवाहका लागि केटालाई पनि चौतर्फी दबाब आउने गरेको भन्दै निश्चल भन्छन्, “केटीहरूलाई त झन कस्तो होला ? कति प्रेसर झेल्नुपर्छ होला भन्ने तथ्यलाई सिनेमा बनाएका छौँ ।” 

चलचित्र पूर्ण मनोरञ्जनात्मक होस् वा सोसल ड्रामा हरेक चलचित्रले केही न केही कथा भन्ने उनी बताउँछन् । “जुन सुकै चलचित्र होस्, त्यसमा दुई घण्टा मेकरको हो । मेकरले दुई घण्टामा केही न केही कुरा भन्छ । त्यसलाई कसरी भन्ने र दर्शकले लिने भन्ने मात्र हो ।” 

‘बेहुली फ्रम मेघौली’को मुख्य भूमिकामा अभिनेत्री स्वस्तिमा खड्का छिन् । उनले सिनेमामा २९ वर्ष उमेर पुगेकी केटीको भूमिका निभाएकी छन् ।  

“हाम्रो चलचित्रमा २९ वर्ष टेकेकी महिला पात्र छ । ३० वर्ष पुग्न लाग्यो । विवाह भएको छैन । अब बर्बाद नै भयो । ३० वर्ष पुगेपछि केटा नै पाउँदैन भन्ने प्रेसर छ,” उनी भन्छिन्, “केटीले मात्रै होइन उसका आफन्त, परिवारबाट आउने प्रेसर केटीले कसरी हेन्डल गर्छ भन्ने कुरा छ । यसलाई रमाइलो तरिकाले देखाइएको छ ।”  

केटीको उमेर बढ्दै गएपछि उसका अगाडि धेरै अप्सनहरू नै स्वत कम भएर जाने उनको भनाइ छ । यही कुरालाई देखाउन ट्रेलरमा एक ठाउँमा संवाद छ,– २९ मा पनि त ३० छ ।
 
“केटीको उमेर बढ्दै गएपछि उसको च्वाइसको अप्सन नै कम हुँदै जान्छ । उमेर बढेपछि डिभोर्स भएको, सुधार केन्द्रबाट निस्किएको केटा पाउँछ भन्नेछ,” स्वस्तिमाले सार्वजनिक कार्यक्रमहरूमा भन्दै आएकी छन्, “यस्तै कुरा हामीले देखाएका छौँ । ३० वर्ष पुगेपछि बिक्दैन भन्ने भाष्यलाई देखाएका छौँ ।” परिवार बसेर हेर्न सकिने चलचित्र बनेको उनको भनाइ छ । 

‘बेहुली फ्रम मेघौली’ असोज १७ गते रिलिज हुँदै छ ।