क्वालालम्पुर । मलेसियाली प्रहरीले इस्लामिक समूहद्वारा सञ्चालित हेरचाह केन्द्रमा बालबालिकामाथि भएको दुर्व्यवहारको अनुसन्धानका क्रममा ३५५ संदिग्धलाई पक्राउ गरिएको जनाएको छ ।

प्रहरी महानिरीक्षक रज्जारुद्दिन हुसेनले शनिबार ग्लोबल इखवान सर्भिस एन्ड बिजनेस (जीआईएसबी)का बाँकी सदस्य पत्ता लगाउन गरिएको अनुसन्धानका क्रममा संदिग्धलाई नियन्त्रणमा लिइएको बताए । प्रहरीले लामो समयदेखि हाल प्रतिबन्धित अल–अर्काम सम्प्रदायसँगको सम्बन्धका निम्ति विवादास्पद जीआईएसबी समूहलाई अनुसन्धानको दायरामा राखेको थियो । 

पक्राउ परेका मध्ये जीआईएसबीका नेता नसिरुद्दिन अलीसहित अरू ३०  सदस्य थिए । 

प्रहरीले च्यारिटी होम, क्लिनिक, व्यवसाय, धार्मिक विद्यालय र निजी निवाससहित ८२ परिसरमा छापा मारेको रज्जारुद्दिनले बताए । अपरेसनमा कम्तीमा १८६ पीडितको उद्धार गरिएको उनले जानकारी दिए ।

मलेसियाका प्रहरी प्रमुख रज्जारुद्दिन हुसेनले मंगलबार अधिकारीले यस समूहसँग सम्बन्धित ९६ बैंक खाता ‘फ्रिज’ गरेको बताएका थिए । त्यसमा लगभग एक लाख २४ हजार डलर मौज्दात थियो । रासस/एएफपी