काठमाडौं । चलचित्र ‘बेहुली फ्रम मेघौली’को ट्रेलर सार्वजनिक गरिएको छ । आज काठमाडौंमा कार्यक्रम गर्दै निर्माण पक्षले ट्रेलर सार्वजनिक गरेको हो । 

ट्रेलरमा छोरीको विवाहका लागि अभिभावकको चिन्ता, उमेर ३० पुगेपछि छोरीको विवाहका लागि हुने समस्या, प्रेम, धोका, छलकपट तथा स्वतन्त्र विचार र निर्णय देख्न सकिन्छ । 

सन्तानको विवाहका लागि अभिभावकले गर्ने चिन्ता र पछिल्लो समयको यथार्थलाई देखाइएको ट्रेलरमा कमेडीको लेप लगाइएको छ । ट्रलेरमा सिनेमाकी मुख्य पात्र स्वस्तिमा खड्का र निश्चल बस्नेत, लोकेन्द्र लेखक, विजय बराललगायत कलाकारलाई देख्न सकिन्छ ।    

चलचित्रमा निश्चल बस्नेत र स्वस्तिमा खड्कासँगै बसुन्धरा भुषाल, विजय बराल, सिमरन खड्का, लोकेन्द्र लेखक, रक्षा थापा, सिरु बिष्ट, आमिर गौतम, शिशिर सिवाकोटी, टीका पहारी, प्रभाकर शर्मा, लुनिभा तुलाधर, मुकुन्द मैनाली र रामबाबु रेग्मीको अभिनय रहेको छ । सिनेमा दशैंको घटस्थापना (असोज १७ गते)बाट प्रदर्शनमा आउँदैछ ।

ब्ल्याक हर्स पिक्चर्स र मेघौली फिल्मसको ब्यानरमा निर्माण भएको चलचित्रमा साजन काफ्ले र आकाश बरालको लेखन तथा निर्देशन रहेको छ । यो उनीहरूको डेव्यु निर्देशकीय चलचित्र हो । अभिनेत्री स्वस्तिमालाई निर्माणमा निर्देशक तथा श्रीमान निश्चलले सघाएका छन् । सिनेमाका कार्यकारी निर्माता फिरोज खड्का र शंकर पाण्डे हुन् ।

चलचित्र असोज १७ गते रिलिज हुँदै छ ।