काठमाडौं । आत्मघाति गोल निर्णायक बन्दा फ्रेन्च क्लब पेरिस सेन्ट जर्मन (पीएसजी)ले स्पेनिस क्लब जिरुनाविरुद्ध १–० को कठिन जित निकालेको छ ।

 बुधबार राति पार्क डे प्रिन्सेसमा भएको खेलमा भाग्यमानी बनेको पीएसजीले निर्धारित समयको अन्तिम मिनेटमा आत्मघाति गोल उपहार पाएको हो । खेलको ९०औँ मिनेटमा जिरुनाका पाउलो गाजानिगाबाट भएको आत्मघाति गोल नै पीएसजीलाई जितका लागि पर्याप्त बन्यो । 

जितसँगै तीन अंक जोडेको पीएसजी तालिकाको १०औँ स्थानमा उक्लिएको छ । च्याम्पियन्स लिगको इतिहासमै पहिलो खेल खेलेको जिरुना तालिकाको २७औँ स्थानमा छ । 

बुधबार राति भएको अर्को खेलमा प्रिमियर लिग च्याम्पियन म्यानचेस्टर सिटी घरेलु मैदानमै इन्टर मिलानसँग गोलरहित बराबरीमा रोकिएको छ । 

बल पोसेसनमा खेलभर नियन्त्रण बनाए पनि एर्लिङ हाल्यान्ड, ज्याक ग्रिलिस, केभिन डी ब्रुयना र बर्नार्डो सिल्भाजस्ता स्टार खेलाडीबाट पनि सिटीले गोल निकाल्न असफल रह्यो ।

पहिलो खेलमै रोकिएको सिटी एक अंकसहित तालिकाको १२औँ स्थानमा छ । समान अंक जोडेको इन्टर ११औँ स्थानमा छ ।