काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले आफूबाट कमजोरी भए पनि अनैतिक र अराजनीतिक काम नभएको बताएका छन् ।

पार्टीको राष्ट्रिय भेलामा बुधबार प्रस्तुत गरिएको राजनीतिक प्रतिवेदनमा उनले भनेका छन्,"मान्छेका रूपमा मेरा कैयौँ कमजोरी होलान् । तर, मबाट अनैतिक, असामाजिक र अराजनीतिक काम भएको छैन । राजनीति यतिसम्म निर्मम र निकृष्ठ हुन्छ भन्ने अनुमान र त्यसको पूर्वतयारी गर्न नसक्नु मेरो कमजोरी हो," उनले भनेका छन् ।

प्रतिवेदनको अंश–

यो प्रतिवेदनमार्फत अरुको आलोचना भन्दा पहिला आफ्नै केही कमजोरी स्वीकार्न चाहन्छु । यति धेरै आमचासोको व्यक्ति नहुँदाको बखत कैयौं निजी मामिलालाई हल्कारुपमा लिनु र तिनको समयमै उचित कानूनी निकास दिन नसक्नु मेरो कमजोरी भयो । राजनीतिमा लाग्नुअघि नै यसरी सबै विषय वा सन्दर्भको योजनावद्ध उत्खनन र आक्रमण हुन्छ भन्ने कुराको सही आंकलन मैले गर्न सक्नु पर्थ्यो । हुन त कुनै पनि आरोप सत्य छैन ।

तर, जति प्रश्न उठे, त्यति पनि ठाउँ दिन हुन्नथ्यो भन्ने ठान्छु । मेरा कुनै बेलाका गैर-राजनीतिक तथा अत्यन्त व्यक्तिगत विषयको भारी सिङ्गो पार्टीले अनाहकमा बोक्नु पर्यो, यसमा म दुःखी छु । आफ्नो तागतको हेक्का नराखी बोलिएका बोली, बडेमानका आश्वासन र त्यसैको आधारमा बढेको जनापेक्षाका पहाड चढ्न हामीलाई निकै गाह्रो भएको सत्य स्वीकार्ने अवसर पनि यही हो।

मान्छेका रुपमा मेरा कैयौं कमजोरी होलान् । तर, मबाट अनैतिक, असामाजिक र अराजनीतिक काम भएको छैन । राजनीति यतिसम्म निर्मम र निकृष्ठ हुन्छ' भन्ने अनुमान र त्यसको पूर्व तयारी गर्न नसक्नु मेरो कमजोरी हो । यसबाट मैले सिक्नुपर्ने विषय त छदैछ, मलाई हेरेर अरु साथीहरूले पनि सिक्नु पर्ने धेरै विषय छन् । कैयौं सीमितता र कमजोरीका बाबजुद पनि मलाई निसर्त र निस्वार्थ साथ दिने रास्वपा परिवारका सबै सदस्यप्रति ऋणी छु, नतमस्तक छु र आभारी छु ।