काठमाडौं । वाग्मती प्रदेश स्केटिङ एन्ड स्केट बोर्डिङ संघको आयोजनामा यही असोज ४ र ५ गते काठमाडौंमा ‘जाम जाम स्केट जाम’ स्केटबोर्ड प्रतियोगिताको आयोजना हुने भएको छ । 

प्रतियोगितामा स्केट बोर्ड र रोलर स्केट गरी दुई विधामा आयोजना हुने र त्यसमा सातै प्रदेशका १७० खेलाडीले प्रतिस्पर्धा गर्ने मंगलबार आयोजित पत्रकार सम्मेलनमा वाग्मती प्रदेश स्केट बोर्डका अध्यक्ष प्रकाश श्रेष्ठले जानकारी गराए । 

थापाथलीस्थित इन्जिनियरिङ कलेजमा हुने रोलर स्केटमा १०० प्रतिस्पर्धी हुनेछन् भने स्केट बोर्ड पुल्चोक क्याम्पसको कोर्टमा हुनेछ । जसमा ७० खेलाडी सहभागी हुनेछन् । प्रतियोगिता खुला रूपमा हुने तथा त्यसमा पुरुष र महिला दुवैले एउटै इभेन्ट्समा बराबरी रूपमा प्रतिस्पर्धा गर्नुपर्ने पनि आयोजकले जनाएको छ । 

खेलको शीर्ष चार स्थानमा आउने खेलाडीले क्रमशः ३० हजार, १५ हजार, १० हजार र पाँच हजार रुपैयाँ पुरस्कार प्राप्त गर्नेछन् । प्रतियोगिताको कुल अनुमानित बजेट आठ लाख रुपैयाँ छ । पत्रकार सम्मेलनमा संघका केन्द्रीय अध्यक्ष अच्युत खनालले स्थानीय पालिकाहरूसँग खेलको विकासका लागि समन्वय गर्दै अघि बढ्ने नीति अनुरुप काठमाडौं महानगरपालिकाबाट स्केट बोर्डको पूर्वाधार बनाउन जग्गा प्राप्त भइसकेको बताए । संघले आवश्यक खेल पूर्वाधार निर्माण गर्न पहल थालिसकेको पनि अध्यक्ष खनालले बताए ।