काठमाडौं । भारतको नयाँ दिल्लीका मुख्यमन्त्री अरविन्द केजरीवालले आज पदबाट राजीनामा दिने तयारी गरेका छन् । मंगलबार मध्याह्न १२ बजेतिर बोलाइएको विधायक दलको बैठकबाट नयाँ मुख्यमन्त्रीको नाम तय गरिनेछ ।

दिल्ली मदिरा नीति प्रकरणमा पक्राउ परेका केजरीवाल यही सेप्टेम्बर १३ मा रिहा भएका थिए । उनी सर्वोच्च अदालतको आदेशपछि जमानतमा रिहा भएका हुन् । सेप्टेम्बर १५ मा उनले मुख्यमन्त्रीबाट राजीनामा दिने घोषणा गरेका थिए ।

“म इमानदार छु वा छैन अब जनताले तय गर्नेछन् । ममाथि लागेको दाग धोएर जनताले विधानसभामा जिताए भने फेरि कुर्सीमा बस्नेछु,” उनले भनेका थिए ।

उनले सन् २०२० फेब्रुअरी १६ मा तेस्रोपटक दिल्लीको मुख्यमन्त्रीको शपथ लिएका थिए ।

किन राजीनामा दिनुपर्ने अवस्थामा पुगे केजरीवाल ?

शक्तिहीन
दिल्ली मदिरा नीति प्रकरणमा पक्राउ परेका केजरीवाल १७७ दिनपछि जमानतमा रिहा भएका हुन् । रिहाइको आदेश दिने क्रममा अदालतले केजरीवाल मुख्यमन्त्री कार्यालयमा जान नपाउने सर्त राखेको थियो ।

कुनै पनि फाइलमा हस्ताक्षर गर्न नपाउने सर्त पनि सर्वोच्चले राखेको थियो । अर्थात्, जेलबाट निस्किएपछि उनी मुख्यमन्त्री त रहने तर कुनै शक्ति हुने थिएन ।

पाँच महिनाको कार्यकाल बाँकी 
वर्तमान दिल्ली विधानसभाको कार्यकाल २०२५ फेब्रुअरीमा सकिँदै छ । अर्थात्, सरकारसँग अब पाँच महिना मात्र बाँकी छ । जेलबाट रिहा भएपछि केजरीवालसँग सहानुभूति छ । त्यसलाई उपयोग गर्दै उनी चुनावी मैदानमा होमिन चाहन्छन् । रिहा भएपछि उनले दिएको अभिव्यक्तिले पनि यो प्रस्ट हुन्छ ।

इमानदार नेताको छविलाई बलियो पार्ने प्रयास
दिल्ली मदिरा नीति प्रकरणमा पक्राउ परेपछि भारतीय जनता पार्टी (भाजपा)का नेताहरूले केजरीवाललाई मुख्यमन्त्री पद छोड्न आग्रह गरेका थिए । अब केजरीवालले आरोप लाग्नेबित्तिकै आफूले पदबाट राजीनामा दिएको बताउनेछन् । र, आफू इमानदार भएको जिकिर गर्नेछन् । भाजपालाई ‘काउन्टर’ गर्न उनीसँग पर्याप्त तर्क हुनेछन् ।

राजीनामापछि के गर्लान् केजरीवाल ?
केजरीवाल मुख्यमन्त्री पदबाट हटे पनि आम आदमी पार्टीको राष्ट्रिय संयोजक बनिरहनेछन् । राजीनामापछि उनले हरियाणा विधानसभा चुनावमा ध्यानकेन्द्रित गर्नेछन् । पार्टीका उमेदवारहरूका निम्ति प्रचार गर्नेछन् । आम आदमीले ९० सिटमा चुनाव लड्दै छ । केजरीवाल आफैँ पनि हरियाणाको सिरसास्थित सिवानी गाउँका हुन् । 

त्यसपछि उनी झारखण्ड र महाराष्ट्र विधानसभा चुनावमा केन्द्रित हुनेछन् । एजेन्सीको सहयोगमा