काठमाडौं । आर्थिक वर्ष २०८१/०८२ को सरकारको नीति तथा कार्यक्रममा वीर अस्पताल, राष्ट्रिय ट्रमा सेन्टर, कान्ति बाललगायत पर्याप्त जनशक्ति भएका अस्पतालबाट दुई ‘सिफ्ट’मा ओपीडी सेवा सञ्चालन गरिने उल्लेख छ । सोही नीतिअनुसार स्वास्थ्य तथा जनसंख्या मन्त्रालयले गएको साउन ४ गते संघस्तरका अस्पताल तथा प्रतिष्ठानमा दुई सिफ्टमा ओपीडी सञ्चालन गर्ने निर्णय गर्‍यो ।

त्यसानुसार गर्न अस्पतालहरूलाई पत्राचार गरिएको थियो । अपराह्न ४ बजेपछि पनि ओपीडी र परीक्षण तथा शल्यक्रिया सेवा बेलुका ८ बजेसम्म सञ्चालन गर्ने स्वास्थ्यमन्त्री प्रदीप पौडेलको प्रस्ताव छ । चिकित्सक/स्वास्थ्यकर्मीलाई प्रोत्साहन भत्ता दिएर ठूला अस्पतालमा दुई सिफ्ट ओपीडी र बेलुका ८ बजेसम्म शल्यक्रिया सेवा विस्तार गर्ने मन्त्रालयको योजना छ ।

अधिकांश अस्पतालले यसअघि नै दुई सिफ्ट ओपीडी र विशिष्टीकृत स्वास्थ्य सेवा (ईएचएस) सञ्चालन गरिरहेका छन् । पछिल्लोपटक कान्ति बाल अस्पतालले यही भदौ २ गतेदेखि ईएचएस सेवा थालेको छ ।

वीर अस्पतालले पनि पूर्ण रूपमा ईएचएस सेवा छिट्टै सञ्चालन गर्ने तयारी गरिरहेको निर्देशक डा. सन्तोष पौडेलले बताए ।

परोपकार प्रसूति तथा स्त्रीरोग अस्पताल, पाटन स्वास्थ्य विज्ञान प्रतिष्ठान, त्रिवि शिक्षण अस्पतालले पनि दिउँसो ३ बजेपछि ईएचएस सेवा दिँदै आएका छन् ।

कहाँ–कहाँ छ दुई सिफ्ट ओपीडी सेवा ?

ओपीडीमा दैनिक दुई हजारदेखि २५ सय बिरामी आइपुग्ने वीर अस्पतालमा बिहानी ओपीडी सेवा ७ः३० देखि दिउँसो १२ः३० सम्म सञ्चालन गरिँदै आएको छ । दोस्रो सिफ्टमा दिउँसो १ः३० देखि अपराह्न ४ बजेसम्म ओपीडी सेवा सञ्चालन गरिन्छ ।

शुक्रराज ट्रपिकल तथा सरुवरोग अस्पतालमा बिहानी सिफ्टमा ९ देखि दिउँसो १ः३० र दिउँसो २ः३० देखि अपराह्न ४ बजेसम्म ओपीडी सेवा सञ्चालन गरिन्छ । पाटन अस्पतालमा बिहान ८ देखि अपराह्न ४ बजेसम्म ओपीडी सेवा सञ्चालन गरिँदै आएको छ ।

कान्ति बालमा भने दिउँसो ३ बजेदेखि सञ्चालन हुने ईएचएसलाई नै दोस्रो सिफ्टका रूपमा सञ्चालन गरिरहेको अस्पतालका निर्देशक डा. पंकज रायले जानकारी दिए ।

कान्तिमा ईएचएसमार्फत मेडिकल, सर्जिकल, डेन्टल र ईएनटी ओपीडी सेवा उपलब्ध छन् । ईएचएसको शुल्क ४५० रुपैयाँ तोकिएको छ । स्वास्थ्य सेवामा हाल कायम जनशक्तिबाटै दुई सिफ्ट ओपीडी चलाउने मन्त्री पौडेलको योजना छ ।

“हामीसँग पर्याप्त नभए पनि दक्ष जनशक्ति छन् । यो क्षमतालाई सेवाभावमा बदलौँ, उपकरणलाई पूर्ण क्षमतामा चलाऔँ,” मन्त्री पौडेलले भनेका छन् ।

अतिरिक्त र सार्वजनिक बिदाका दिन ओपीडी सेवा सञ्चालन गरेबापत प्रोत्साहन भत्ता (इन्सेन्टिभ) उपलब्ध गराउने मन्त्रालयको योजना छ । दुई सिफ्टमा ओपीडी सञ्चालन गर्दा अस्पतालहरूमा हाल कायम ईएचएस भने बन्द गरिनेछ ।

इन्सेन्टिभबारे मापदण्ड निर्धारण गर्न मन्त्रालयले नेपाल चिकित्सक संघका पूर्वअध्यक्ष समेत रहेका डा. लोचन कार्कीको संयोजकत्वमा पाँच सदस्यीय समिति गठन गरेको थियो । समितिले अतिरिक्त समय काम गर्ने चिकित्सक/स्वास्थ्यकर्मीको पारिश्रमिक, सेवा भत्तालगायत विषय समेटेर मन्त्रालयमा प्रतिवेदन बुझाइसकेको छ ।

चिकित्सक/स्वास्थ्यकर्मीको पारिश्रमिक वृद्धि तथा कार्यसम्पादनका आधारमा इन्सेन्टिभ बढाउने गरी समितिले सिफारिस गरेको संयोजक डा. कार्कीले बताए । यही रिपोर्टमा अतिरिक्त ‘डिउटी’ गरेबापतको अंकभार पनि निर्धारण गरिएको छ ।

सार्वजनिक बिदाका दिन पनि ओपीडी

सार्वजनिक बिदाका दिनमा हाल केही अस्पतालले ‘हाफ’ ओपीडी सेवा प्रवाह गरिरहेका छन् । तर, त्यसबापत चिकित्सक/स्वास्थ्यकर्मीले कुनै भत्ता र सुविधा नपाएको परोपकार प्रसूति तथा स्त्रीरोग अस्पतालका निर्देशक डा. श्रीप्रसाद अधिकारीले बताए । मन्त्रालयले इन्सेन्टिभको व्यवस्था गरेमा अहिलेकै जनशक्तिले दुई सिफ्ट ओपीडी सेवा सञ्चालन गर्न सम्भव रहेको उनको भनाइ छ ।

सार्वजनिक बिदाका दिन ओपीडी सेवाबारे मन्त्रालयको निर्णय कार्यान्वयन गर्न तयार रहेको कान्ति बाल अस्पतालले पनि जनाएको छ । आउँदा दिनमा सार्वजनिक बिदामा ओपीडी खुल्ने निर्देशक डा. रायले बताए । 

यीबाहेक त्रिवि शिक्षण अस्पताल र सहिद गंगालाल राष्ट्रिय हृदय केन्द्रले हाफ र पाटन स्वास्थ्य विज्ञान प्रतिष्ठानले ‘फुल’ ओपीडी चलाइरहेका छन् । सार्वजनिक बिदाका दिन त्रिवि शिक्षण अस्पतालमा बिहान ८ देखि दिउँसो १ बजेसम्म ओपीडी सञ्चालन गरी करिब १५ सय बिरामीलाई सेवा दिने गरिएको छ । अरू दिनमा यो संख्या २२ सयको हाराहारीमा हुन्छ ।

सार्वजनिक बिदामा पनि सबै कर्मचारी उपस्थित हुने र उनीहरूलाई काममा खटिएबापत अस्पतालको आन्तरिक स्रोतबाट एक दिनको पारिश्रमिकका दरले अतिरिक्त भत्ता उपलब्ध गराउने गरिएको प्रशासन प्रमुख प्रमोदकुमार निरौलाले बताए ।

पाटन अस्पतालमा बुधबार र शनिबार ओपीडी सेवा बन्द गरिँदै आएको छ । अरू सार्वजनिक बिदाका दिनमा उक्त अस्पतालमा पूरै ओपीडी सेवा सञ्चालन गरिन्छ । उक्त दिन सबै कर्मचारी उपस्थित हुने र उनीहरूले मासिक पारिश्रमिकभित्रैबाट सेवा प्रवाह गरिरहेका अस्पतालका प्रशासन प्रमुख तीर्थ भुजेलले जानकारी दिए ।