विराटनगर । दिपेश राजवंशी बिहान एक सय रुपैयाँ तिरेर डुंगामा मोटरसाइकल राखेर मोरङको रंगेली पुग्छन् । साँझ काम सकेर फेरि गौरीगन्ज फर्कन्छन् । रतुवा खोला उर्लिएका बेला त आउजाउ बन्द नै हुन्छ । 

प्रधानमन्त्री केपी शर्मा ओलीको गृह जिल्ला र निर्वाचन क्षेत्र सुगम भएर पनि दक्षिणवर्ती क्षेत्रका मानिसले डुंगा नचढी झापा टेक्न सक्दैनन् । 

झापाको गौरीगन्ज र मोरङ रतुवामाई नगरपालिका जोड्ने रतुवा खोलाबाट दैनिक डुंगामा ओहोरदोहोर गर्ने दिपेशजस्ता धेरै मानिस छन् । साइकलमा चढ्नेले २० रुपैयाँ प्रतिगोटा बुझाउनु पर्छ । बिहान तिरेको पैसाले एक दिनमा दुई पटक ओहोर दोहोर गर्न पाइन्छ । 

“पुल बनिसकेर सजिलै बिना पैसा आउन–जान पाइएला भनेर कुरेको पनि सोह्र वर्ष बितिसक्यो,” दिपेशले भने, “प्रधानमन्त्री नै हाम्रो क्षेत्रको हुनुहुन्छ । अब चाँडै काम सकिएला भन्ने आशा छ ।”

मोरङको रतुवामाई नगरपालिका र झापाको गौरीगन्ज गाउँपालिकामा अवस्थित रतुवा खोलमाथि पुल बन्न थालेको सोह्र वर्ष भएको छ । तर, पुलको काम अझै पूरा भएको छैन । पहिले बनेको पुल खोलाले धार परिवर्तन गरेपछि बीच भागमा पुगेको छ । त्यसपछि धेरै समय काम रोकिँदा स्थानीयलाई भने सास्ती छ । 

दुई वर्षअघि पुनः ठेक्का लागेपछि पुल निर्माणको काम जारी छ । हुलाकी मार्गअन्तर्गत बन्ने यो पुल निर्माण भए झापाबासीलाई प्रदेश राजधानी विराटनगर आइपुग्न केही छिटो हुनेछ । हुलाकी मार्ग अहिले पनि निर्माणाधीन छ । खजुरगाछीबाट छोराछोरी लिएर मोरङको आमबाडी आउँदै गरेकी अनिता गजतराजले भनिन्, “दमक हुँदै घुमेर आउनुभन्दा बरु डुंगा चढेर यताबाट आउँदा समय बच्छ ।” 

रतुवा खोलमा स्थानीयले बाँसको पुल बनाएका छन् । त्यहाँ एउटा काठको डुंगा राखिएको छ । त्यसमै बसाएर मोटरसाइकल, स्कुटर, साइकल, गाईबस्तु राखेर तार्ने गरिएको छ । 

हुलाकी राजमार्ग निर्देशनालय योजना कार्यालय इटहरीका अनुसार दुई वर्षभित्र निर्माण सक्नेगरी पुल निर्माणको काम जारी छ । अधुरो रहेका स्थानमा ७५ मिटरको पुलको तीनवटा स्पन निर्माण भई ढलान भइसकेको छ । 

मोरङ र झापातर्फ २५ मिटर पुलको लम्बाइ थपिएको छ । रिटेनिङ वाल बनिसकेपछि पुल संचालनमा आउनेछ । २०८२ असार मसान्तसम्म निर्माण सम्पन्न गर्ने योजना छ । 

हालसम्म गौरीगन्जतिर ६५० र मोरङतर्फ १ हजार ४ सय मिटर तटबन्ध निर्माण भइसकेको छ । रतुवा खोलामा पहिलो पटक २०६४/६५ मा पुल निर्माणको ठेक्का लागेको थियो । पुल निर्माणको काम अवलोकन गर्न केही दिनअघि कोसी प्रदेशका मुख्यमन्त्री हिक्मत कार्की रतुवा पुगेका थिए ।