वासिंटन । अमेरिकाको मिसौरी राज्यका बर्डफ्लुबाट संक्रमित जनावरको सम्पर्कमा नआइकन एक व्यक्तिमा बर्ड फ्लु संक्रमण देखिएको छ ।

रोग नियन्त्रण तथा रोकथाम केन्द्रअन्तर्गतको मिसौरी ‘डिपार्टमेन्ट अफ हेल्थ एण्ड सिनियर सर्भिसेज’का अनुसार ती वयस्क बिरामीलाई अगस्ट २२ मा अस्पताल भर्ना गरिएको थियो । बिरामीलाई इन्फ्लुएन्जाविरुद्ध एन्टिभाइरल औषधि दिएपछि निको भएको र अस्पतालबाट डिस्चार्ज गरी सकिएको जनाइएको छ ।

प्रारम्भिक परीक्षणमा बिरामीको फ्लुको प्रकार शंकास्पद देखिएकाले यसलाई राज्य र संघीय प्रयोगशालामा थप परीक्षणका लागि पठाइएको थियो । परीक्षणबाट ती बिरामीलाई यो एच–५ (बर्डफ्लु) भएको पुष्टि भएको छ ।

यो वर्ष अमेरिकामा बर्डफ्लुको संक्रमण पुष्टि हुने उनी १४औँ व्यक्ति थिए भने जनावरहरूसँगको सम्पर्कबिना बर् फ्लु पुष्टि हुने उनी पहिलो व्यक्ति थिए ।

“मिसौरीमा दूधका लागि पालिएका गाईहरूमा एच ५ संक्रमण रिपोर्ट गरिएको छैन,” मिसौरी स्वास्थ्य विभागले भनेको छ, “यद्यपि ‘व्यावसायिक वा घरको आँगनमा पालिने केही पंक्षीहरूको समूह वा जंगली चरा’हरूमा बर्डफ्लु संक्रमण भएको भने पुष्टि भएको छ ।

सन् २०२२ मा बर्डफ्लुका सबै घटनाहरू फार्मवर्कर्समा थिए, जसमा पहिलोपटक पनि समावेश थियो ।

बर्डफ्लु सबैभन्दा बढी जंगली चराचुरुंगी र कुखुरामा पाइन्छ, तर पछिल्लो समय स्तनधारी जनावरमा पनि देखिएको छ । यस वर्ष देशभर बर्डफ्लुको प्रकोप गाईवस्तुमा पनि देखिएको छ । रासस/एएफपी