काठमाडौं । फिफा विश्वकप दक्षिण अमेरिकी छनोटमा साविक विजेता अर्जेन्टिनाले नियमित कप्तान लियोनल मेसीबिना नै चिलीविरुद्ध ३–० को सहज जित निकालेको छ । मेसीले चोटका कारण फिफाको सेप्टेम्बर विन्डो गुमाउने भएका हुन् ।

शुक्रबार मास मोनुमेन्टल रंगशालामा घरेलु टोली अर्जेन्टिनालाई जित दिलाउन म्याक एलिस्टर, जुलियन अल्भारेज र पाउलो डिबालाले गोल गरे । तीनै गोल दोस्रो हाफमा भएको थियो ।

खेलको ४८औँ मिनेटमा एलिस्टरको गोलमार्फत अर्जेन्टिनाले अग्रता लिएको थियो ।

निर्धारित समय सकिन ६ मिनेट बाँकी रहँदा अल्भारेजले टोलीको अग्रता दोब्बर बनाए । उनले जियोभानी लो सोल्सोको पासलाई पोस्टको दिशा दिए ।

इन्जुरी समयमा अलेजान्ड्रो गार्नाचोले मिलाइदिएको पासलाई जाली चुमाउँदै डिबालाले अर्जेन्टिनालाई ३–० को सहज जित दिलाए ।

जितसँगै दक्षिण अमेरिकी छनोटको शीर्ष स्थानमा रहेको अर्जेन्टिनाले सात खेलबाट १८ अंक जोडेको छ । पराजित चिली समान खेलबाट पाँच अंकका साथ नवौँ स्थानमा छ ।