काठमाडौं । अमेरिकी उपराष्ट्रपति कमला ह्यारिसले पूर्वराष्ट्रपति डोनाल्ड ट्रम्पको आलोचना गरेकी छन् ।

ट्रम्पको चुनावी अभियानका क्रममा आर्लिंगटन नेसनल सेमट्रीमा भएको विवादपछि ह्यारिसले सैनिक चिहान राजनीति गर्ने ठाउँ नभएको भन्दै आलोचना गरेकी हुन् ।

ह्यारिसले शनिबार सामाजिक सञ्जालमा एक पोस्ट गर्दै ट्रम्पले राजनीतिक स्टन्टको लागि पवित्र भूमिको अपमान गरेको टिप्पणी गरेकी हुन् । ट्रम्प र ह्यारिस दुवै अमेरिकी राष्ट्रपतिको चुनावी प्रतिस्पर्धामा छन् ।

गत सोमबार उक्त सैन्य चिहानमा फोटो–भिडियो खिच्ने क्रममा ट्रम्पका एक कर्मचारीले चिहानका कर्मचारीलाई धक्का दिएको अमेरिकी सेनाले जनाएको छ । धक्का दिएको भनिएका कर्मचारीले त्यहाँ फोटो–भिडियो खिच्नेबारे चेतावनी दिइरहेका थिए ।

ट्रम्पको चुनावी अभियानले भने मृतक सैनिकका परिवारले नै फोटो खिच्न अनुमति दिएको र आग्रह गरेको बताएको छ ।

विवाद भएको ठाउँ सन् २०२१ मा राष्ट्रपति जो बाइडेन प्रशासनले नै अफगानिस्तानबाट सेना फिर्ता गर्दा ज्यान गुमाएका १३ सैनिकको सम्झनास्थल हो ।

ट्रम्पले नै पनि त्यहाँ आफुलाई फोटो खिच्न आग्रह गरेको बताएका छन् । ट्रम्पका उपराष्ट्रपतिका उम्मेदवार जेडी भान्सले बाइडेन प्रशासनकै कमजोरीका कारण ती सैनिकले ज्यान गुमाएको टिप्पणी गरेका छन् ।