काठमाडौं । चलचित्र ‘बेहुली फ्रम मेघौली’को निर्माणपक्षले गीत ‘छड्के सलाम’मा कभर भिडियो बनाउन आग्रह गरेको छ । उत्कृष्ट कभर भिडियो चलचित्रमा समावेश गरिने निर्माणपक्षले जनाएको छ ।

‘बेहुली फ्रम मेघौली’को गीत ‘छड्के सलाम’को कुनै पनि साउन्ड प्रयोग गरी ल्यान्डस्केप साइजमा कभर भिडियो बनाउनुपर्नेछ । भिडियो एचडी क्वालिटीको हुनुपर्ने छ । भिडियोलाई आफ्नो सामाजिक संजालमा पोस्ट गरेर उक्त भिडियो निर्माणपक्षलाई पठाउनुपर्नेछ । कभर भिडियो जुनसुकै उमेर समूहका व्यक्तिले बनाउन सक्ने निर्माणपक्षले जनाएको छ । 

यो गीतमा निश्चल बस्नेत र स्वस्तिमा खड्कालगायतले अभिनय गरेका छन् । 

चलचित्रमा निश्चल र स्वस्तिमासँगै बसुन्धरा भुषाल, विजय बराल, सिमरन खड्का, लोकेन्द्र लेखक, रक्षा थापा, सिरु विष्टलगायतको अभिनय छ । 

चलचित्रमा साजन काफ्ले र आकाश बरालको लेखन तथा निर्देशन रहेको छ । अभिनेत्री स्वस्तिमा खड्कालाई निर्माणमा निर्देशक तथा श्रीमान् निश्चल बस्नेतले सघाएका छन् । सिनेमाका कार्यकारी निर्माता फिरोज खड्का र शंकर पाण्डे हुन् ।

चलचित्र असोज १७ गतेबाट प्रदर्शनमा आउँदै छ ।