प्राग । चेक अधिकारीहरूले शुक्रबार एउटा प्रमुख चेक पेट्रोकेमिकल कारखानामा गत साता खनेको दोस्रो विश्वयुद्धको विस्फोट नभएको बमलाई विस्फोट गराएको अग्निनियन्त्रण विभागले बताएको छ ।

अगस्ट २१ मा मजदुरहरूले कारखानाको साइटको दुर्गम स्थानमा हतियार फेला पारेपछि प्रहरीले प्रागको उत्तरपश्चिममा करिब एक किलोमिटर टाढा जालुजी संयन्त्र वरपर ६ दिनसम्म सुरक्षा घेरा स्थापना गरेको थियो ।

प्रहरीले सयौँ मानिसलाई आफ्नो घर छाड्न आदेश दिएको थियो भने पोलिश पेट्रोल कम्पनी ओरलेनले सञ्चालन गरेको कारखाना बन्द गरिएको थियो ।

“बमको विस्फोट सफल भयो, स्थानीय समयानुसार १२ः१३ मा बम विस्फोट भयो,” अग्नि नियन्त्रण विभागले साइटबाट ड्रोन तस्बिरहरू पोस्ट गर्दै सामाजिक सञ्जाल एक्समा भनेको छ, “हामीले साइटको गहन जाँच गरिरहेका छौँ, प्रारम्भिक दृश्य खोजले छिमेकमा कुनै ठूलो क्षति नभएको देखिएको छ ।”

विस्फोटअघि अग्निनियन्त्रकहरूले बालुवाको बोराहरूबाट बमलाई अलग गरेका थिए ।

२५० किलोग्रामको ब्रिटिश हवाई बमको विस्फोटमा ढिलाइ गर्नका लागि अद्वितीय रासायनिक ट्रिगरले सुसज्जित थियो । प्रहरीले यसलाई विशेष रूपमा खतरनाक रहेको बताएको छ ।

गत साता प्रहरीले विज्ञप्ति जारी गर्दै भनेको थियो, “यो खोजको खतरा र दुर्लभता ट्रिगरिङ संयन्त्रमा निहित छ, यसलाई एक सय ४४ घन्टा वा ६ दिनसम्म सेट गर्न सकिन्छ ।”

डेढ वर्गकिलोमिटर परिधिबाहेक चेक प्रहरीले छ सय मानिसलाई पनि खाली गर्न आदेश दिएको छ ।

तत्कालीन चेकोस्लोभाकियामा जर्मन कब्जाको समयमा नाजी युद्ध प्रयासमा सेवा प्रदान गर्ने उक्त कारखाना सन् १९४४ मा मित्र राष्ट्रहरूको बमबारीको निशानामा थियो । रासस/एएफपी