प्रसिद्ध धार्मिकस्थल । मुलुकमा सुख, शान्ति, समृद्धिको कामना गर्दै त्यस धार्मिकस्थल परिसरमा धार्मिक अनुष्ठान प्रारम्भ गरियो ।

भक्तजनद्वारा गरिने दानानुसार सम्मानको व्यवस्था गरिएको रहेछ । सानो दान गर्नेलाई सानै सम्मान, ठूलो दान गर्नेलाई ठूलै सम्मान । भक्तजनहरूको घुइँचो थामी नसक्नु थियो । यसो भनौँ, उनीहरूबीच सम्मानप्राप्तिको होडबाजी नै चलेको थियो ।

स्वयंसेवकहरूमध्ये कोही मन्दिर परिसरको सफाइमा खटिएका थिए । कोही दूध, घिउ, महको अजस्र धारा खन्याउँदै भगवान्को मूर्तिलाई नुहाइदिँदै गरेका देखिए ।

अनुष्ठानमा सबै तह, वर्गका मानिसको उपस्थिति देखिन्थ्यो । गरिबगुरुवादेखि साहुमहाजनसम्म सबैसबैलाई सुख, शान्ति, समृद्धिको लालसाले डोर्‍याएको थियो सायद ।

अनुष्ठानको अन्तिम दिन तिलको शुद्ध तेलमा सवा करोड दीप प्रज्वलन गरियो । ड्रमका ड्रम तेल खन्याइयो ।

श्रद्धालु एवम् भक्तजनहरू अत्यन्त प्रफुल्लित र सन्तुष्ट देखिए । तिनका चम्किला आँखामा सुख, शान्ति अनि समृद्ध मुलुकको ‘ब्लु प्रिन्ट’ झल्कियो ।

त्यही साँझ उक्त धार्मिकस्थलअगाडि धर्मशालामा बस्ने एउटी महिलाले मृत्युवरण गरिन् । प्रहरी आयो, मुचुल्का उठायो, पोस्टमार्टमका लागि शव अस्पताल लग्यो ।

भोलिपल्ट पोस्टमार्टमको रिपोर्ट आयो । रिपोर्ट थियो– भोको पेटमा धेरै दिनदेखि अन्न नपरेका कारण महिलाको प्राण गएको देखिन्छ ।