काठमाडौं । नेपाली कांग्रेसको केन्द्रीय समिति बैठक सुरु भएको छ । गत साउन २३ देखि २८ सम्म चलेर स्थगित भएको बैठक आज पुनः सुरु भएको हो । 

सानेपास्थित नेपाली कांग्रेसको केन्द्रीय कार्यालयमा सुरु भएको बैठकका मुख्य मुद्दा महासमितिमा प्रस्तुत प्रस्तावलाई कसरी पारित गर्ने भन्नेमा केन्द्रित छ । महामन्त्रीद्वय विश्वप्रकाश शर्मा र गगन थापाका दुई प्रस्तावमा रहेको विषयहरू पार्टी संस्थापनले स्वीकार नगर्दा त्यसको पुनर्लेखनका लागि बैठक स्थगित गरिएको थियो । 

महामन्त्री शर्माले अगाडि सारेको पदसम्बन्धी प्रस्ताव र थापाको चुनावी गठबन्धन नगर्नेसम्बन्धी दुईवटा विषयलाई नेपाली कांग्रेसको संस्थापनले आपत्ति जनाउँदै आएको छ । महामन्त्री शर्माले नेतृत्व हस्तान्तरणको स्वभाविक पद्धति विकास गर्न एकपटक राष्ट्रपति, दुईपटक प्रधानमन्त्री, तीनपटक मन्त्री र चारपटकसम्म सांसद बन्न पाउने र त्योभन्दा बढी पटक एउटै व्यक्तिले पद लिन नपाउने प्रस्ताव गरेपछि त्यसको विरोध भइरहेको छ । 

शर्माको प्रस्ताव लागु भए २०४८ देखि २०६४ सम्म चुनाव जितेर पद लिएका व्यक्ति स्वतः बाहिरिनेछन् । महामन्त्री गगन थापाको चुनावी गठबन्धन नगर्ने प्रस्तावबाट भने संस्थापन पक्ष अप्ठ्यारोमा परेको छ । संस्थापन पक्षले अन्य दलको गठबन्धन भएमा गठबन्धन अनिवार्य हुने भन्दै त्यसमाथि सैद्धान्तिक प्रश्न उठाएको छ । 

चुनावी गठबन्धन गर्ने वा नगर्ने विषय नीति होइन रणनीति हो र त्यो दस्तावेजमा लेखिने नभएर तत्कालीक अवस्थामा निर्णय गर्ने विषय भएको संस्थापन पक्षको तर्क छ । त्यही कारण उसले चुनावी गठबन्धन नगर्ने विषय दस्तावेजबाट झिकिनु पर्ने माग राखेको छ । 

तर महामन्त्री गगन थापाले पार्टीका कार्यकर्ताले आफ्नै चुनाव चिह्नमा भोट हाल्न पाउनुपर्ने प्रस्तावका विपक्षमा को–कोे उभिन्छ भनेर आफूले र नेता कार्यकर्ताले त्यसको हिसावकिताव राख्ने बताएका छन् ।

बैठकमा आज पदाधिकारी र पूर्वपदाधिकारीले बोल्ने क्रम चलिरहेको एक केन्द्रीय सदस्यले जानकारी दिए ।