काठमाडौं । म्यानचेस्टर सिटीका मिडफिल्डर फिल फोडेनले व्यावसायिक फुटबल एसोसियसन वर्ष खेलाडीको अवार्ड जितेका छन् । एसोसियनले मंगलबार युवा मिडफिल्डर फोडेनलाई वर्ष खेलाडी चयन गरेको हो । 

यस्तै, चेल्सीका विंगर कोल पाल्मेर वर्षको उत्कृष्ट युवा खेलाडी चयन भएका छन् । प्रिमियर लिगको इतिहासमा सन् २००९–१० को सिजनपछि यी दुवै अवार्ड इंग्लिस खेलाडीले जितेको यो पहिलो पटक हो । 

यसअघि उक्त सिजन वाइन रुनी वर्ष खेलाडी र जेम्स मिल्नर वर्ष युवा खेलाडी चुनिएका थिए । “यो अवार्ड जित्नु केही विशेष हो । यसका लागि म गौरवान्वित र कृतज्ञ महसुस गरिरहेको छुँ,” वर्ष खेलाडी चुनिएपछि फोडेनले भने । 

गत सिजन सिटीले ऐतिहासिक रूपमा लगातार चौथोपटक प्रिमियर लिगको उपाधि जित्दा फोडेनले ३५ खेलमा १९ गोल गरेका थिए । यस्तै, वर्ष युवा खेलाडी चुनिएका पाल्मेरले चेल्सीबाट ३४ खेल खेल्दा २२ गोल गरेका थिए ।