जेनेभा । विश्व स्वास्थ्य संगठन (डब्ल्यूएचओ)ले एमपक्स भाइरसको थप खतरनाक भेरिएन्टको फैलावटलाई नियन्त्रण गर्न खोपको उत्पादन बढाउन शुक्रबार उत्पादकलाई आग्रह गरेको छ । डब्ल्यूएचओले प्रजातान्त्रिक गणतन्त्र कंगोबाट सुरु भएर अरू देशमा फैलिएपछि एमपक्सलाई बुधबार दुई वर्षमा दोस्रोपटक विश्वव्यापी सार्वजनिक स्वास्थ्य आपत्काल घोषणा गरेको हो ।

“एमपक्सको प्रकोपलाई नियन्त्रण गर्न हामीलाई साँच्चै नै खोपको उत्पादन बढाउन आवश्यक छ,” डब्ल्यूएचओकी प्रवक्ता मार्गरेट ह्यारिसले सञ्चारकर्मीसित भनिन् ।

डब्ल्यूएचओले एमपक्स खोपको भण्डार भएका देशलाई हाल प्रकोप फैलिएको मुलुकलाई वितरण गर्न आग्रह गरिरहेको छ । हालैका वर्षहरूमा डेनमार्कको औषधि उत्पादक बवेरियन नर्डिकद्वारा उत्पादित एमभीए–बीएन  र जापानको एलसी१६ गरी दुई प्रकारका एमपक्सविरुद्धको खोप प्रयोग भइरहेको छ । 

पाँच लाख एमभीए–बीएन खोप हाल भण्डारमा रहेको उनले उल्लेख गरिन् । आवश्यकताअनुसार २४ लाख खोप तत्काल उत्पादन गर्न सकिने उनले बताइन् । सन् २०२५ का निम्ति खरिद अनुरोधमा थप एक करोड खोप उत्पादन गर्न सकिने उनको भनाइ छ ।

“एलसी१६ खोपको भने व्यावसायीकरण गरिएको छैन । यो जापान सरकारको तर्फबाट उत्पादन गरिएको हो । यस खोपको पर्याप्त भण्डार छ,” ह्यारिसले भनिन् ।

डब्ल्यूएचओले एलसी१६ खोपको वितरणका निम्ति टोकियोसँग सहकार्य गरिरहेको जनाएको छ ।

द डक्टर्स विदाउट बोर्डर्स च्यारिटी नामक संस्थाले खोपको भण्डार भएका तर भाइरसको कुनै प्रकोप नभएका देशहरूले अफ्रिकाका प्रभावित मुलुकलाई सकेसम्म धेरै खोप वितरण गर्न आग्रह गरेको छ ।

डब्ल्यूएचओले सन् २०२२ मा पनि ७० भन्दा बढी देशमा फैलिएपछि मंकीपक्स भनेर चिनिने एमपक्सलाई विश्वव्यापी आपत्काल घोषणा गरेको थियो । यो वर्ष १० अफ्रिकी राष्ट्रमा एमपक्स पत्ता लागेको छ ।

“एमपक्सको संक्रमण अफ्रिकाभित्र र त्योभन्दा बाहिर फैलन सक्ने सम्भावना रहेकाले यो चिन्ताजनक अवस्था हो,” डब्ल्यूएचओका प्रमुख टेड्रोस एड्हानोम गेब्रेयसस भने ।

प्रकोपलाई नियन्त्रण गर्न एक समन्वयकारी अन्तर्राष्ट्रिय प्रतिक्रिया आवश्यक रहेकामा उनले जोड दिएका छन् । रासस/एएफपी