काठमाडौं । चलचित्र ‘ज्वाइँ साब’को पोस्टर सार्वजनिक भएको छ । निर्माणपक्षले आज रिलिज मिति सार्वजनिक गर्दै दुईवटा पोस्टर बजारमा ल्याएको हो । 

पोस्टरमा सिनेमाका मुख्य कलाकार फिचर्ड छन् । जितु नेपाल र नीति शाह पोस्टरको केन्द्रमा छन् । एउटा पोस्टरमा जितु र नीति दुलाहा दुलहीको पहिरनमा छन् । 

दोस्रो पोस्टरमा दुलाहा बनेका जितु डोलीमा छन् । डोली बुद्धि तामाङ र हिमेश पन्तले बोकेका छन् । डोलीको अगाडि निती पनि छिन् । 

पोस्टरअनुसार चलचित्र दसैँको छेको पारेर रिलिज हुनेछ । दसैँको बिदालाई लक्षित गर्दै चलचित्र असोज २४ गतेबाट रिलिज हुनेछ ।  

“हामी असोज २४ मा आउनुको कारण बिदा हो । अरु कुनै कारण छैन । बिदामा सिनेमा रिलिज गर्ने भन्ने थियो,” निर्देशक वसन्तले बाह्रखरीसँग भने, “हाम्रो निर्माता अहिले अस्ट्रेलियामा हुनुहुन्छ । उहाँले असोज २४ मै रिलिज गर्ने भनेपछि हामी यो मितिमा आउन लागेका हौँ ।” 

‘ज्वाइँ साब’ले प्रदर्शन मिति असोज २४ लाई रोज्दा यो सिनेमा ‘छक्का पञ्जा–५’ भिड्नुपर्ने छ । यही मितिमा दीपकराज गिरी र दीपाश्री निरौलाको चलचित्र पनि रिलिज हुने यसअघि नै तय भइसकेको छ । 

वसन्त निरौलाको निर्देशनमा ‘ज्वाइँ साब’ तयार भएको चलचित्र हो । 

विजय बस्याल कार्यकारी निर्माता रहेको चलचित्रमा सविन अधिकारीको कथा, शंकर धितालको पटकथा तथा संवाद छ । 

चलचित्रमा जितु र नीतिसँगै वुद्धि तामाङ, हिमेश पन्त, रमेश वुढाथोकी, प्रकाश घिमिरे, निमा पाण्डेलगायत कलाकारको अभिनय छ ।