काठमाडौं । पार्टीको सिद्धान्त नमान्नेलाई पार्टी कार्यालयको कम्पाउन्डबाहिर पठाउनुपर्ने भन्दै कांग्रेस केन्द्रीय समिति बैठकमा आवाज उठेको छ । सोमबारको केन्द्रीय समिति बैठकमा बोल्दै केन्द्रीय सदस्य उमेशजंग रायमाझीले कांग्रेसलाई सिद्धान्त र समाजवाद चाहिँदैन भन्ने मान्छेलाई पार्टीको गेट बाहिर निकाल्नुपर्ने धारणा राखेको अर्का एक सदस्यले बताए ।

ती केन्द्रीय सदस्यका अनुसार रायमाझीले कसैको नाम भने उल्लेख गरेनन् । तर, उनको आशय बुझ्दा पार्टी प्रमुख सचेतक श्याम घिमिरे लाइनकै जवाफ थियो । 

“उहाँले नाम लिनुभएन । तर, श्याम घिमिरेतिरै निशाना थियो,” ती केन्द्रीय सदस्यले भने, “सिद्धान्त यही हो । बीपीले पनि सिद्धान्तबिनाका राजनीति पाप हो भनेका छन् । कांग्रेसलाई सिद्धान्त चाहिँदैन, समाजवाद चाहिँदैन भन्ने हो भने त्यस्तो मान्छेलाई कि पार्टीबाट हटाउनुपर्‍यो यो गेटबाट बाहिर निकाल्नुपर्‍यो । होइन भने बीपीको फोटोसँग उहाँको फोटो टाँस्न पर्‍यो भनेर उहाँले भन्नुभयो ।”

सोमबारको केन्द्रीय समिति बैठकमा बोल्दै प्रमुख सचेतक घिमिरेले नेपाली कांग्रेसको सिद्धान्त के हो ? हामी समाजवादी हौँ कि ‘सोसल डेमोक्र्याटिक’ हौँ भन्दै प्रश्न गरेका थिए । उनले बीपी जीवित भएको भए समाजवादको रटान लगाइरहन्थे भन्ने प्रश्न पनि गरेका थिए । कांग्रेस ‘सोसल डेमोक्र्याटिक’ पार्टी भएको जिकिर गर्दै घिमिरेले काग्रेस कम्युनिस्टबीचको अन्तर के हो, कांग्रेसले पनि आफूलाई समाजवादी भनेपछि लगानी कसरी आकर्षित हुन्छ भन्दै प्रश्न गरेका थिए ।