काठमाडौं । काठमाडौं महानगरपालिकाको कार्यालय अगाडिको सडकमा भ्वाङ परेको छ । कमलादीस्थित महानगरको कार्यालयअगाडिको सडकमा बिहीबार राति भ्वाङ परेको हो । टुकुचा खोलामाथि बनाइएको सडकमा भ्वाङ परेको हो । 

यो भ्वाङ सडक विभागले मर्मत गर्छ अथवा काठमाडौं महानगरले ? काठमाडौं महानगरपालिका र सडक विभागबीच सडकको क्षेत्राधिकारलाई लिएर विवाद हुँदै आएको छ । केही समय अगाडिमात्र न्युरोड क्षेत्रमा महानगरले फुटपाथ विस्तार गर्न खोजेपछि सडक विभागले महानगरलाई रोकेको थियो ।

विभागविरुद्ध महानगर सर्वोच्च अदालत पुगेको थियो । अदालतले यो विवाद हालका लागि सल्टाए पनि यसको निरुपण भने भइसकेको छैन । महानगरसँग सडकको क्षेत्राधिकारको विषयमा विवाद बल्झिएपछि सडक विभागले उपत्यकाका सडकमा (सडक विभाग) लेखेर आफ्नो क्षेत्राधिकार दाबी गरेको थियो ।

महानगरको कार्यालय अगाडिको सडकमा परेको भ्वाङ सडक विभागअन्र्तगतको सडक डिभिजन कार्यलयले मर्मत गर्ने बताएको छ । डिभिजन कार्यालयका सूचना अधिकारी महानन्द जोशीले भ्वाङ परेको सडक डिभिजन कार्यलयले मर्मत गर्ने बताए । उनले बाह्रखरीसँग भने, “त्यो सडक हाम्रो क्षेत्राधिकारभित्र पर्छ । मर्मत पनि हामी गर्छौं ।” 

सडक विभाग र काठमाडौं सडक डिभिजन कार्यालयको टोलीले भ्वाङ परेको सडकको अवलोकन गरिसकेको छ । डिभिजन कार्यालयका सव–इन्जिनियर गणेश बोहोराका अनुसार डिभिजन कार्यालयले मर्मतका लागि लाग्ने खर्च र प्राविधिक विषयको योजना तयार गर्दैछ । उनले भने, “हामीले त्यो भ्वाङको निरीक्षण गरिसक्यौँ । अहिले त्यसको मर्मतका लागि प्राविधिक र आर्थिक योजना बनाउँदैछौँ ।”

सव–इन्जिनियर बोहोराका अनुसार भ्वाङ परेको सडकमुनि टुकुचा खोला छ । सडकको भ्वाङबाट टुकुचा खोला देख्न सकिन्छ । सडकमुनि टुकुचा खोला भएका कारण भ्वाङको मात्रै नभएर खोलामाथिको सबै सडकको मर्मत गर्ने योजना रहेको बोहोराले सुनाए । उनले भने, “त्यो खोलामाथि छ, त्यसैले हामी त्यो सबै सडक नयाँ निर्माण गर्ने र खोलामाथि कल्र्भट बनाउनेगरी डिजाइन गरिरहेका छौँ ।” 

काठमाडौं महानगर पनि यसपटक सडक डिभिजन कार्यालयलाई नै मर्मत गर्न दिने तयारीमा छ । महानगरका प्रवक्ता नवीन मानन्धर भन्छन्, “जसले छिटो बनाउँछ, उसैले बनाउने हो । डिभिजनले छिटो बनाउँछ भने बनाओस् । जसले बनाए पनि राज्यकै सडक हो ।”

काठमाडौं महानगरले वि.सं. २०७९ मै टुकुचा खोलामाथि बनेका घर–संरचना हटाउन खोजेको थियो । तर, उच्च अदालत पाटनले महानगरको काम रोक्न आदेश दिएको थियो । त्यही टुकुचा खोलामाथिको सडकमा भ्वाङ परेपछि महानगरका मेयर बालेन शाहले सामाजिक सञ्जालमा खोलामाथि बनेका घर–संरचनाको लगतकट्टा गर्न भूमि व्यवस्था, सहकारी तथा गरिबी निवारण मन्त्रालयमा पठाएको बताएका छन् ।