काठमाडौं । साहित्यकार माधव बिडारीद्वारा लिखित उपन्यास ‘फेरिल’ व्यास नगरपालिकाकी उपप्रमुख इन्दिरा दरैले लोकार्पण गरेकी छन् । उपन्यासमा आदिवासी, जनजाति, सीमान्तकृत दरै जातिहरूको विषयवस्तु समेटिएको उपन्यासकार बिडारीले जानकारी दिए । 

तनहुँको दमौलीमा आयोजित कार्यक्रममा दरैले कृति सार्वजनिक गर्दै आदिवासी जनजाति दराई समुदायको कथावस्तुमा आधारित रहेर लेखिएको यस उपन्यासले यस समुदायको रीतिरिवाज, कला, संस्कृतिको संरक्षणमा थोरै भए पनि मदत पुग्ने बताइन् ।

गण्डकी वाङ्मय प्रतिष्ठान, तनहुँकी अध्यक्ष गौकुमारी न्यौपानेले पुस्तकमाथि समीक्षात्मक टिप्पणी गरिन् ।

उक्त अवसरमा आदिकवि भानुभक्त क्याम्पस दमौलीका प्रमुख महाप्रसाद हड्ख, चिजबहादुर दरै, दिलबहादुर दरै, ठाकुरबहादुर दरै, विजय दरै, उपन्यासकार बिडारी लगायतले बोलेका थिए । 

पूर्वकथा र अपूर्वकथा गरी दुई भागमा विभाजित उपन्यास १२३ पृष्ठको रहेको जनाइएको छ । उपन्यास स्रष्टालय बुक्स एन्ड पब्लिकेसन, टोखाले प्रकाशनमा ल्याएको हो ।