काठमाडौं । अमेरिकी सुपरस्टार केटी लडेकीले ओलम्पिकमा सबैभन्दा धेरै स्वर्ण पदक जित्ने महिला खेलाडीको कीर्तिमानसँग बराबरी गरेकी छन् । 

पेरिस ओलम्पिक–२०२४ अन्तर्गत पौडीको ८०० मिटर फ्रिस्टाइलमा आठ मिनेट ११.०४ को समयसहित स्वर्ण जितेसँगै लडेकीले यो कीर्तिमान बनाएकी हुन् । जारी ओलम्पिकमा उनको पौडीमा जितेको यो चौथो स्वर्ण पदक हो । 

लडेकी ओलम्पिकको एउटै इभेन्टमा चार स्वर्ण जित्ने पहिलो स्विमर र एक्ली महिला खेलाडी हुन् । यसअघि यो कीर्तिमान पुरुष स्विमर माइकल फेल्पसले बनाएका थिए । 

ओलम्पिकको इतिहास लडेकीले जितेको यो नवौँ स्वर्ण हो भने १४औँ पदक हो । उनी अघि महिलातर्फ सेभियतकी जिम्न्यास्ट लारिसा लातिनिनाले ओलम्पिकमा नौ स्वर्ण जितेकी थिइन् । 

ओलम्पिकको इतिहासमा सर्वाधिक पदक जित्ने खेलाडीको कीर्तिमान भने फेल्पससँग छ । उनले २३ स्वर्णसहित कुल २८ पदक जितेका छन् । “चारपटकको यो कीर्तिमानले मेरो लागि धेरै अर्थ राख्दछ । अगस्ट ३ २०१२ को त्यही दिन हो, जुन दिन मैले पहिलो पदक जितेको थिए । मैले ममाथि निकै दबाब थपेको थिए । अहिले म खुसी छु । मैले मेरो काम पूरा गरे,” खेलपछि लडेकीले भनिन् । लडेकीलाई विश्वभर ‘क्विन अफ द पूल’ को उपनामले पनि चिनिन्छ ।