काठमाडौं । प्रि–सिजन तयारीमा रहेको स्पेनिस क्लब रियाल मड्रिडले इटालियन क्लब एसी मिलानसँग १–० को हार व्यहोरेको छ । बुधबार राति अमेरिकास्थित सोल्जर फिल्डमा मिलानलाई जित दिलाउन एक मात्र गोल स्यामुयल चुक्वेजले गरे ।

पहिलो हाफ गोलरहित बराबरीमा सकिएको थियो । चुक्वेजले ५५औँ मिनेटमा गोल गर्दै मिलानलाई अग्रतामा राखेका थिए ।

रियालले अब अगस्ट ४ मा अर्को स्पेनिस क्लब बार्सिलोनासँग प्रतिस्पर्धा गर्नेछ । रियालले अगस्ट ७ मा इंग्लिस क्लब चेल्सीको सामना गर्नेछ । यस्तै, मिलानले अगस्ट ७ मा बार्सिलोनाविरुद्ध खेल्नेछ ।

लिभरपुल २–१ आर्सनल
बुधबार नै भएको अर्को क्लब मैत्रीपूर्ण खेलमा आर्सनलविरुद्ध लिभरपुलले २–१ को जित निकाल्यो । लिभरपुलको जितमा मोहम्मद सालाह र फाबियन कार्भाल्होले गोल गरे । आर्सनलका काई हाभार्ड्जले एक गोल फर्काएका थिए ।

मैत्रीपूर्ण फुटबलमा आर्सनलले अब जर्मन क्लब बायर लेभरकुजेनविरुद्ध अगस्ट ७ मा प्रतिस्पर्धा गर्नेछ ।