गाजा । गएको बुधबार पाँच इजरायलीको शव बरामद गरेसँगै इजरायलको सेनाले शनिबार दक्षिणी गाजाको खान युनिस सहरका बासिन्दालाई उक्त स्थान खाली गर्न आदेश जारी गरेको छ ।

इजरायली सेनाले गएको सोमबारदेखि यो क्षेत्रमा कारबाही सुरु गरेदेखि  लडाइँका कारण एक लाख ८० हजारभन्दा बढी प्यालेस्टाइनी विस्थापित भएका संयुक्त राष्ट्रसंघले जनाएको छ ।

प्यालेस्टाइनी क्षेत्रमा बिग्रँदो स्वास्थ्य र सरसफाइको अवस्था रिपोर्ट गर्दै राष्ट्रसंघले बढ्दो द्वन्द्व र बारम्बारको निकासीले सहायता कार्यलाई अस्थिर बनाएको उल्लेख गरेको छ ।

सोमबार खान युनिसमा इजरायली कारबाहीमा ७० जनाको मृत्यु हुनुका साथै २०० भन्दा बढी मानिस घाइते भएका त्यहाँको स्वास्थ्य मन्त्रालयले जनाएको छ ।

सुरुआती समयमा तीव्र लडाइँ भएको त्यस क्षेत्रबाट इजरायलतर्फ रकेट फायर रोक्ने कार्य गर्ने जनाउँदै सेनाले निकासी आदेश दिएको हो । खान युनिसका बासिन्दालाई अल–मवासीको समायोजित मानवीय क्षेत्र खाली गर्न इजरायली सेनाले दिएको यो दोस्रो आदेश हो ।  

प्रत्यक्षदर्शी र उद्धारकर्ताले शुक्रबार पूर्वी खान युनिस वरपर लडाइँ जारी रहेको र सहरको नासेर अस्पतालमा चिकित्सकले दक्षिणी प्रान्तका विभिन्न भागबाट कम्तीमा १६ जनाको शव उद्धार गरेको बताएका छन् । रासस/एएफपी