बेइजिङ । प्यालेस्टाइनका १४ समूहलाई बेइजिङमा बोलाएर आपसमा मिल्ने सहमति गराएको चीनले फेरि युक्रेनका विदेशमन्त्री डिमिट्रो कुलेबालाई समेत चीन भ्रमणमा बोलाएर कुराकानी गरेको छ ।

युक्रेनका विदेशमन्त्रीले यसअघि रुसले आफ्नो देशमा आक्रमण गरेपछि चीन भ्रमण गरेका थिएनन् ।

यी दुवै भूमिकालाई लिएर चीनले विश्वमा पिस ब्रोकरको भूमिका खेल्न खोजेको रूपमा अन्तर्राष्ट्रिय जगतले औंल्याएको छ । चीनले आपसमा सहमति गराएका प्यालेस्टाइन समूहमा हमास र फटाह पनि छन् । 

ती दुवै संगठन प्रतिद्वन्द्वीको अवस्थामा थिए । अहिले विश्वमा सबैभन्दा तनावको विषय रुस–युक्रेन युद्ध र गाजा क्षेत्र मानिदै आएको छ । 

दुवैमा चीनले यसपटक हात हालेको छ । यसअघि यस्ता काम अमेरिकाले गर्दै आएको थियो । चीनले अहिले विश्वमामिलामा  आफूलाई अमेरिकाको विकल्पको रूपमा उभ्याउन खोजेको देखिएको छ ।

पश्चिमा जगतले यसअघि मस्कोलाई रुसले सहयोग गरिरहेकोले युक्रेन युद्ध चर्किएको आरोप लगाइरहेको बेलामा चीनले युक्रेनका विदेशमन्त्रीलाई निम्त्याएको हो । दुवै भेटघाटमा चिनियाँ विदेशमन्त्री वाङ यीको सक्रियता देखिएको छ ।

युक्रेनका विदेशमन्त्री कुलेबासँगको भेटपछि वाङले भनेका छन्, “शान्तिका लागि हुने प्रयासमा बेइजिङले समर्थन गर्नेछ ।”

चीनको रुससँग राम्रो सम्बन्ध हुँदाहुँदै पनि आफूलाई उसले निष्पक्ष मध्यस्थकर्ताको भूमिका निर्वाह गर्न खोजेको पाइएको छ ।सीएनएन