ताइपेई । ताइवानमा गेमी आँधीपछि तल्लो भेगमा बाढी आएको छ । पहिरो समेत गएको छ । आँधीले घर र पसलहरूमा क्षति पुगेको छ ।

आँधीले पश्चिमी प्रशान्त क्षेत्रलाई बगाएको छ । यसबाट फिलिपिन्समा बाढी र पहिरोबाट २२ जनाको मृत्यु भएको छ । ताइवानमा पनि तीनजनाको मृत्यु भएको छ । २२० जनाभन्दा बढी घाइते भएका छन् ।

ताइवानमा कार्यालय र विद्यालय बिहीबार लगातार दोस्रो दिन बन्द गरिएको छ । नागरिकलाई घरमै बस्न र सामुद्रिक तटबाट टाढा रहन आग्रह गरिएको छ ।

ताइवान नियमित रूपमा आँधीको चपेटामा पर्ने गर्छ । चेतावनी प्रणालीलाई बढाइएको छ । तर, ताइवानको स्थलाकृति, बढी जनघनत्व र उच्च प्रविधिको अर्थतन्त्रका कारण यस्ता आँधी आउँदा हुने क्षतिबाट बच्न कठिन हुन्छ ।

फिलिपिन्समा डुबेर र पहिरोका कारण मृत्यु हुनेको संख्या बढेको छ । प्रहरीका अनुसार, कम्तीमा तीनजना बेपत्ता छन् ।

बिहीबार बिहानै बाटन प्रान्तको लिमेय सहरमा १४ लाख लिटर औद्योगिक इन्धन तेलले भरिएको ट्यांकर डुबेको र उद्धारकर्ताले १६ मध्ये १५ जना चालक दलका सदस्यको उद्धार गरेको फिलिपिन तटरक्षकले जनाएको छ ।

ट्यांकर डुब्नुको सम्बन्ध खराब मौसम र अशान्त समुद्र थियो वा थिएन भन्ने तत्काल स्पष्ट भएको छैन । तर, यातायात सचिव जेमी बाउटिस्टाले सामुद्रिक अवस्थाका कारण सम्भावित तेल चुहावटलाई रोक्न तटरक्षककर्मी तत्काल उक्त क्षेत्रमा पुग्न नसेकेको बताए ।

ताइवानको पूर्वी तटमा वायुसेनाको अभ्यास आँधीका कारण रद्द गर्नुपरेको छ ।

फिलिपिन्समा क्यारिना भनिने गेमीले त्यहाँ भूस्खलन निम्त्याएको छैन । तर, मौसमी मनसुनी वर्षालाई बढाएको छ ।

फिलिपिन्सका राष्ट्रपति फर्डिन्यान्ड मार्कोस जुनियरले अधिकारीहरूलाई गाउँहरूमा खाद्यान्न र अरू सहायता पु¥याउने प्रयासलाई तीव्र बनाउन आदेश दिएका छन् । “त्यहाँका जनताले धेरै दिनसम्म खाना नखाएका हुन सक्छन्,” टेलिभिजनमा प्रसारित आपत्कालीन बैठकमा उनले भने ।

फिलिपिन्सको राजधानी वरपरका बाक्लो जनसंख्या भएका क्षेत्रमा वर्षाका कारण धेरै स्थानमा बाढी आएकाले सरकारी कामकाज र विद्यालयको पठनपाठन रोकिएको छ ।

आँधी उत्तरपश्चिमी दिशामा मुख्य भूमि चीनतर्फ बढेकाले यसको प्रभाव शुक्रबारसम्म जारी रहने अपेक्षा गरिएको छ । रासस/एपी