काठमाडौं । दुई घण्टापछि भिडियो असिस्टेन्ट रेफ्री (भार)ले गोल रद्द गर्दा पेरिस ओलम्पिक, २०२४ को पहिलो खेलमा अर्जेन्टिनाले मोरोक्कोसँग २–१ को हार बेहोरेको छ ।

बुधबार फ्रान्समा भएको खेलमा अर्जेन्टिना २–१ ले पछि परेको अवस्थामा क्रिस्टियन मेडिनाले इन्जुरी समयको गोल गर्दै अर्जेन्टिनालाई २–२ को बराबरीमा फर्काएका थिए । तर, रेफ्रीले दुई घण्टापछि अर्जेन्टिनाको दोस्रो गोल अफसाइट भएको भन्दै खारेज गरेपछि खेल मोरोक्कोले २–१ ले जितेको थियो ।

मेडिनाको गोलपछि मैदानमा समर्थक पस्दा खेल स्थगित भएको थियो । त्यसको दुई घण्टापछि खेल पुनः सुरु भएको हो । खेल पुनः सुरु हुँदा अर्जेन्टिनाको दोस्रो गोल रद्द गरी तीन मिनेट थप खेलाइएको थियो ।

त्यसअघि खेलको इन्जुरी समयमा सौफियने रहिमीले गोल गर्दै मोरोक्कोलाई अग्रतामा राखेका थिए । ५१औँ मिनेटमा पेनाल्टीमार्फत रहिमीले नै गोल गरेपछि मोरोक्कोले अग्रता दोब्बर बनाएको थियो । तर, ६८औँ मिनेटमा गुइलियनो सिमानेले गोल गर्दै अर्जेन्टिनालाई २–१ को अवस्थामा ल्याएका थिए ।

निर्धारित समयपछि रेफ्रीले १५ मिनेटमा इन्जुरी समय थप्दा अर्जेन्टिनाका मेडिनाले बराबरी गोल फर्काएका थिए । तर, भारले दुई घण्टापछि गोल रद्द गर्दा अर्जेन्टिनाले तीन अंक गुमाएको हो । 

दुई घण्टापछि गोल रद्द हुँदा अर्जेन्टिनाका प्रशिक्षक हाभियर मास्चेरानो आक्रोसित बने । “मैले मेरो जिवनमै देखेको यो सबैभन्दा ठूलो सर्कस हो,” खेलपछि अर्जेन्टिनी प्रशिक्षकले भने ।

यस्तै, अर्जेन्टिनाका स्टार लियोनल मेसीले पनि इन्स्टाग्राममा ‘असामान्य’ भएको बताएका छन् ।