![पेरिस ओलम्पिक–२०२४ः पुरुष फुटबल आजदेखि](https://12khari.top/uploads/posts/peries-olampic-1721796675.png)
काठमाडौं । पेरिस ओलम्पिक–२०२४ मा आजदेखि पुरुष फुटबलतर्फका खेलहरू सुरू हुँदै छन् । फ्रान्सको पेरिसमा ओलम्पिक जुलाई २६ देखि आधिकारिक रुपमा सुरु हुने भए पनि पुरुष फुटबल भने आजदेखि सुरु हुँदै छ ।
प्रतियोगिताको पहिलो दिन कुल आठ खेल हुने तालिका छ । प्रतियोगितामा आज नेपाली समयअनुसार साँझ ६ः४५ बजेदेखि स्पेनले उज्वेकिस्तान र अर्जेन्टिनाले मोरोक्कोविरुद्ध प्रतिस्पर्धा गर्नेछन् ।
राति ८ः४५ बजेदेखि न्युजिल्यान्डले गुयना र इजिप्टले डोमिनिक गणतन्त्रविरुद्ध खेल्नेछन् । राति १०ः४५ बजेदेखि इराकले युक्रेन र जापानले पाराग्वेविरुद्ध खेल्ने तालिका छ ।
राति १२ः४५ बजे पनि दुई खेल हुनेछन् । जसमा फ्रान्सले अमेरिका र मालीले इजरायलविरुद्ध खेल्ने छन् ।
प्रतियोगिताको पुरुष फुटबलतर्फ कुल १६ टिमको सहभागिता छ । जसलाई प्रत्येक समूहमा चार टिम रहने गरी चार समूहमा विभाजन गरिएको छ ।