काठमाडौं । कलाकारको पारिश्रमिकलाई सञ्चारमाध्यममा आएका समाचारलाई धेरैले आशंका गर्छन् । त्यसमा पनि ‘हाइपेड’ कलाकारको पारिश्रमिकमा झनै धेरै आशंका हुने गरेको छ । 

नेपाली चलचित्र उद्योगमा सबैभन्दा धेरै पारिश्रमिक लिने अभिनेताको रूपमा अनमोल केसीको नाम आउँछ । उनले प्रतिचलचित्र ५० लाख रुपैयाँ पारिश्रमिक लिने गरेको खबरहरू आउने गरेका छन् ।

यो खबरलाई चलचित्र ‘फर्की फर्की’का निर्माताले पुष्टि गरेका छन् । ‘फर्की फर्की’का निर्माता रोहित अधिकारीले आफूले अनमोललाई ५० लाख रुपैयाँ पारिश्रमिक दिएको बताए ।

उनले अनमोलले ‘फर्की फर्की’बाट लिएको पारिश्रमिकबाट तिरेको करको प्रमाण सार्वजनिक गरेका छन् । अनमोलले ५० लाख रुपैयाँ पारिश्रमिक लिँदा सात लाख ५० हजार रुपैयाँ कर राज्यलाई तिरेका छन् ।

औसतमा पारिश्रमिकबारे बोले पनि कलाकारहरू यति नै हो भनेर पारिश्रमिको नम्बर भने तोक्दैनन् । यसको कारण हो, कर । यो सिनेमाबाट यति पारिश्रमिक लिएँ भनेको अवस्थामा सरकारी निकायले चाहेको अवस्थामा करका लागि ताकेता गर्ने डरले कलाकार आफ्नो पारिश्रमिकबारे स्पष्ट खुलाउँदैनन् ।  

तर, अनमोलले भने कर तिरेको प्रमाण नै सार्वजनिक गरेका हुन् । कतिपय कलाकारले आम्दानी लुकाएर कर नतिर्ने गरेको टिप्पणी हुँदै आएको छ ।