काठमाडौं । काठमाडौं प्रहरीको विशेष टोलीले आइतबार ठमेलको एक होटलबाट आगूऔषध कोकिनसहित मलेसियन एक महिलालाई पक्राउ गर्‍यो । काठमाडौं प्रहरी परिसरका प्रमुख एसएसपी बसन्त रजौरेका अनुसार, पक्राउ पर्ने महिला ४७ वर्षीय बथुमलाई भादिभालू हुन् ।

उनको साथबाट प्रहरीले पाँच किलो ८२० ग्राम कोकिन बरामद गरेको हो । कोकिनको नेपाली मूल्य २० करोड ३७ लाख रुपैयाँ भएको जानकारी एसएसपी रजौरेले दिए ।

प्रहरीको प्रारम्भिक अनुसन्धानका क्रममा ती महिला १३ जुलाई शनिबार ११ बजे काठमाडौं आइपुगेको खुलेको छ । उनी ठमेलको सिटी होटलमा बसेकी थिइन् । काठमाडौं प्रहरीको विशेष सूचनाका आधारमा आइतबार बिहान कोठा सर्च गर्दा कोकिन फेला पारेपछि उनलाई पक्राउ गरेको हो ।

प्रहरीको अनुसन्धानका क्रममा उनी १२ जुलाईमा मलेसियाबाट लाओस उडेकी थिइन् । त्यहाँबाट थाइल्याण्ड हुँदै काठमाडौं आएकी हुन् । प्रहरीको अनुसन्धानबाट उनी भरियामात्रै रहेको खुलेको छ ।

तस्करी गर्ने समूहसँग उनले सामाजिक सञ्जाल ‘ह्वाट्सएप’ मात्रै प्रयोग गरेको पाइएको छ । प्रहरीको अनुसन्धानका क्रममा तस्करी गर्ने मुख्य नाइके लाओस र एक भारतमा रहेर उनलाई भरियाको रुपमा प्रयोग गरेको देखिएको छ ।
 
बथुमलाईले लाओस हुँदै काठमाडौं पुर्‍याएको कोकिन आइतबार बिहान भारत लैजाने तयारी गरेपछि मात्रै नियन्त्रणमा लिएको हो । प्रहरीको अनुसन्धानका क्रममा बथुमलाईले लाओसबाट नै स्कुल ब्यागहरुभित्र फल्सबटम बनाएर कोकिन ल्याएको पाइएको छ ।

यसरी पाएको थियो प्रहरीले सूचना

काठमाडौं प्रहरीले एकै पटक यति ठूलो परिणामको लागूऔषध कोकिन बरामद गरेको पहिलो पटक भएको जनाएको छ । शनिबार राति थाइल्यान्ड हुँदै काठमाडौं आएकी महिला भेट्न भारतबाट पनि एक महिला काठमाडौं आइपुगेकी थिइन् ।

प्रहरीका अनुसार, भारतबाट आएकी महिला दिउँसो १२ बजे नै काठमाडौं ओर्लिएकी थिइन् । उनीसमेत ठमेलको सीटी होटलमै बसिन् ।

उनी थाइल्याण्डबाट काठमाडौं आउँदै गरेकी महिलाको प्रतिक्षामा होटलमा बसेकी थिइन् । दिल्लीबाट आएकी ती महिलाले थाइल्याण्डबाट आएकी महिलासमेत आइतबार आफूसँगै दिल्ली लैजाने योजना बनाएको बुझिएको छ ।
 
तर, आइतबार बिहानै कोकिनसहित बथुमलाईले आफू भारत जान नमिल्ने र आफूले बोकेको लगेजभित्रको ६ वटा स्कुल ब्यागमात्रै दिल्ली पुर्‍याई दिन आग्रह गरिन् । भारतबाट आएकी महिलाले ब्यागमात्रै लिन नसक्ने र ब्यागभित्र रहेको सामानबारे चासो मात्रै राखिनन् कि उनले ब्याग खोलेर सामान समेत हेरिन् ।

तर, झोलाभित्रको सामान भने सामान्य हिसाबले प्याक गरिएको थिएन । ब्यागभित्र फल्सबटम बनाएर प्याक गरिएको थियो । ती महिलाले झोलाभित्र शंकास्पद बस्तु देखिन् । त्यसपछि झोला बोक्दा आफू फस्न सक्ने आशंकासहित मलेसियन महिलाले थाहा नपाउने गरी प्रहरीलाई खबर गरिन् ।

दिल्लीबाट आएकी महिलाले प्रहरीलाई खबर गरेपछि प्रहरी बथुमलाई बसेको ठमेलको सीटी होटल पुगेको थियो । प्रहरीले स्कुल ब्याग खोलेर हेर्दा भने कोकिन देखेपछि मलेसियन महिला बथुमलाई पक्राउ गर्न सफल भएको हो ।

सूचना दिने भारतीय महिलामाथि प्रहरीले सोधपुछ जारी राखेको छ । प्रहरीको अनुसन्धानका क्रममा पक्राउ परेकी मलेसियन महिलाले पटक–पटक कोकिनको कारोबार गरेको प्रहरीको अनुसन्धानका क्रममा खुलेको छ ।

उनी थाइल्याण्ड हुँदै पाँच पटक काठमाडौं आएको खुलेको छ । प्रहरीको सोधपुछका क्रममा भने उनी नेपाली र अंग्रेजी दुवै भाषा नआउने भन्दै बयान दिन इन्कार गरिरहेकी छिन् । उनी मलेसियन भाषा मात्रै बोल्छिन् ।