काठमाडौं । स्पेनलाई हराएर युरो–२०२४ को उपाधि जित्न इंग्ल्यान्ड रणनीतिकरूपमा दुरुस्त हुनुपर्ने प्रशिक्षक ग्यारेथ साउथगेटले बताएका छन् ।

इंग्ल्यान्डले बुधबार नेदरल्यान्ड्सविरुद्ध २–१ को जित निकाल्दै पहिलोपटक विदेशी भूमिमा भएको कुनै पनि प्रतियोगिताको फाइनलमा स्थान बनाएको हो ।

इंग्ल्यान्ड पहिलो युरोपियन च्याम्पियनसिपको खोजीमा हुँदा स्पेन तीन पटकको विजेता हो ।

“यो प्रतियोगितामा उनीहरूले जे गरेका छन्, त्यसआधारमा उनीहरू नै प्रतियोगिताको मुख्य दाबेदार हुन् । उनीहरू उत्कृष्ट टिम बनेका छन्,” साउथगेटले भने, “उनीहरू उत्कृष्ट टिम भएकाले हामी रणनीतिकरूपमा दुरुस्त बन्न आवश्यक छ ।”

यस्तै, आर्सनलका इंग्लिस मिडफिल्डर डेक्लान राइसले भने युरो–२०२० को फाइनलमा इटालीसँगको हार आइतबारको खेलमा प्रेरणा बन्ने बताए । लन्डनमा भएको उक्त प्रतियोगिताको फाइनलमा इटालीले इंग्ल्यान्डलाई पेनाल्टी सुटआउटमा ३–२ ले पराजित गर्दै उपाधि जितेको थियो ।

“इटालीले उपाधि उचालिरहेको देखेको कुराले मलाई सधैँ पिडा दिन्छ । हामी अहिले अर्को उपाधि नजिक छौँ, जहाँ हामीले आफ्नै इतिहास लेख्ने अवसर छ । तर, हामीविरुद्ध अर्को उत्कृष्ट प्रतिद्वन्द्वी छ,” राइसले भने ।