काठमाडौं । स्वास्थ्य बिमा बोर्डले बिमामा आबद्ध नागरिकबाट प्याकेजका सेवामा मात्रै को पेमेन्टबापतको शुल्क लिन निर्देशन दिएको छ । प्रत्येक परीक्षण तथा औषधि लिँदा छुट्टाछुट्टै शुल्क लिने गरेको पाइएपछि बोर्डले यस्तो निर्देशन दिएको हो । 

यसरी प्रत्येक सेवामा अतिरिक्त शुल्क लिनु को पेमेन्टको अवधारणविपरीत भएको बोर्डको ठहर छ । अस्पताल भर्ना भएर उपचार गराएका बिरामीको हकमा पनि डिस्चार्ज हुँदा दाबी गरिएको प्याकेजअनुसार मात्रै को पेमेन्ट लिन भनिएको छ । 

बोर्डले २०८१ वैशाखदेखि सरकारी सेवा प्रदायक संस्थामा १० र निजीमा २० प्रतिशत को पेमेन्टको व्यवस्था गरेको छ । जसअनुसार अस्पतालबाट प्रदान गरिने अन्तरंग, बहिरंग, निदानात्मक, उपचारात्मक, शल्यक्रिया, फिजियोथेरापी र पुनस्र्थापना सेवामा लागेको जम्मा खर्चमध्ये बिरामीले १० प्रतिशत व्यहोर्नुपर्छ । 

सरकारीबाहेकका स्वास्थ्य संस्थाबाट यी सेवा लिँदा भने सेवाग्राहीले २० प्रतिशत शुल्क आफैँले तिर्नुपर्छ । तर, अकस्मिक स्वास्थ्य सेवा, सरकारद्धारा निःशुल्क प्रदान गर्न तोकिएका आधारभूत स्वास्थ्य सेवा र औषधिमा भने को पेमेन्ट लागु हुँदैन ।  

साथै, अतिगरिबको परिचयप्राप्त परिवार, ७० वर्षमाथिका ज्येष्ठ नागरिक, रातो कार्ड पाएका अति अशक्त, अपांगता भएका नागरिक, कुष्ठरोगी, एचआईभी संक्रमित, जटिलखालका क्षयरोगीलाई पनि को पेमेन्ट लागु हुँदैन । 

त्यस्तै, महिला स्वास्थ्य स्वयंसेविका र सरकारले समय समयमा तोकेका वर्गले समेत को पेमेन्ट गर्नु पर्दैन ।