काठमाडौं । आत्मघाती गोल निर्णायक बन्दा टर्कीयाविरुद्ध २–१ को जित निकाल्दै नेदरल्यान्ड्स युरो–२०२४ को सेमिफाइनलमा प्रवेश गरेको छ । 

शनिबार राति ओलम्पियस्टाडियोन बर्लिनमा भएको खेलमा नेदरल्यान्ड्सका स्टेफलन डे भ्राइले गोल गरे । डच टिमले अर्को गोल भने टर्कीयाका खेलाडीबाट आत्मघाती उपहार पाएको थियो ।

खेलको ३५औँ मिनेटमा समिट अकायदिनले गोल गरेपछि टर्कीयाले पहिलो हाफमा १–० को अग्रता बनाएको थियो । तर, ७०औँ मिनेटमा भ्राइको गोलमा डच टिम खेलमा फर्कियो । त्यसको ६ मिनेटपछि टर्कीयाका मेर्ट मुल्डुरबाट आत्मघाती गोल उपहार पाएपछि नेदरल्यान्ड्सले २–१ को अग्रता बनाएको हो ।

यही गोल निर्णायक बन्दा नेदरल्यान्ड्स २० वर्षपछि युरोपियन च्याम्पियनसिपको सेमिफाइनलमा प्रवेश गरेको हो । सन् १९८८ को च्याम्पियन डच टिम यसअघि २००४ को संस्करणमा सेमिफाइनल प्रवेश गरेको थियो ।

प्रतियोगिताको फाइनल प्रवेशका लागि नेदरल्यान्ड्सले इंग्ल्यान्डविरुद्ध खेल्नेछ । इंग्ल्यान्डले यसअघि स्वीट्जरल्यान्डविरुद्ध पेनाल्टीमा हराउँदै सेमिफाइनल यात्रा तय गरेको थियो ।