काठमाडौं । राष्ट्रिय स्वतन्त्र पार्टी (रास्वपा)का महामन्त्री मुकुल ढकाललाई कारबाहीसम्म पुर्‍याउने समीक्षा प्रतिवेदन सार्वजनिक भएको छ । महामन्त्री ढकाललाई निलम्बित गरेको भोलिपल्ट रास्वपाले समीक्षा प्रतिवेदन सार्वजनिक गरेको हो ।

प्रतिवेदनमा सभापतिले राजनीतिमा आउनुअघि बोलेको विषय बिर्सिंदा पार्टीको वास्तविक पहिचान नै मेटिन लागेको भन्दै नेता कार्यकर्ताको चिन्ता समेटिएको छ ।

“सिधाकुरा जनतासँग कार्यक्रममा बोलेका कुरा जनताले सम्झिराखेका छन् । तर, सभापतिले बिर्सिएजस्तो छ,” प्रतिवेदनमा नागरिकको सभाप्रतिको दृष्टिकोणमा राखिएको छ, “पार्टीको मेरुदण्ड नै त्यही कार्यक्रम थियो । पार्टीमा सिधाकुरा जनतासँग कार्यक्रमका मान्छे पनि केन्द्रीयस्तरमै आए, सभापतिको सचिवालयमा नै बसे । तर तिनीहरूले पनि सिधाकुरा जनतासँग कार्यक्रम बिर्सिएर अरू राजनीति गर्न थाले ।”

प्रतिवेदनमा नेता कार्यकर्ताले सबैभन्दा धेरै पार्टी सभापतिमाथि प्रश्न उठाएको पनि उल्लेख छ ।

“चेसमा रानी धेरै चल्दैन । तर हाम्रो पार्टीमा किन सभापति नै धेरै चलेको ? सभापति आफैँ गृहमन्त्री भएर किन गएको ? सीके राउत जस्तो ब्याकमा किन नबसेको ?,” प्रतिवेदनमा समेटिएका कार्यकर्ताका प्रश्नमा भनिएको छ, “जीबी राई कहिले समातिन्छन् ? समात्न सकिँदैनथ्यो भने प्रतिपक्षीमा हुँदा किन म्याद नै तोकेर बोलेको ?”

कार्यकर्ताले सभापति लामिछानेसँग भेट पाउनभन्दा भारतीय प्रधानमन्त्री नरेन्द्र मोदीलाई भेट्न सजिलो भएको भनेर टिप्पणी गरेको प्रतिवेदनमा उल्लेख छ । कार्यकर्ताले सभापतिको सचिवालय पनि रुखो लागेको बताएका छन् ।

“यही सचिवालयबाट अगाडि बढे सभापतिबाट राजनीति सम्भव छैन,” कार्यकर्ताको सुझावमा भनिएको छ ।

सभापतिले बनाएको केन्द्रीय समितिमाथि समेत कार्यकर्ताले गम्भीर प्रश्न उठाएको प्रतिवेदनमा उल्लेख छ ।

“किन ग्यालेक्सीको टिम धेरै भयो ? सभापतिले विश्वासको दायरा बढाउन नसकेको हो ?,” सभापतिमाथि कार्यकर्ताले प्रश्न गरेका छन्, “सरकारमा गएपछि सोचेअनुरूप फाइल किन खोलिएन ? निर्मला पन्तलाई न्याय कहिले मिल्छ ? ब्लू बस र रोजगारीको कुरा कता पुग्यो ?”