काठमाडौं । काठमाडौंमा बिहानैदेखि बदली रहेको छ । पूर्णतया बदली हुँदा काठमाडौंमा वर्षाको सम्भावना रहेको छ । 

“काठमाडौंमा वर्षा सुरु भइसकेको छैन । तर, दिउँसो वर्षा हुन्छ,” मौसमविद् गोविन्द झाले बाह्रखरीसँग भने, “हल्कादेखि मध्यम वर्षाको सम्भावना छ ।” 

केही स्थानमा भने भारी वर्षा पनि हुनसक्ने उनले जानकारी दिए । १०/११ बजेपछि सुरु हुने वर्षा केही समयमा रोकिने र पर्नेक्रम दिनभर जारी रहने उनको भनाइ छ । 

यसैबीच, जल तथा मौसम विज्ञान विभागका अनुसार सातवटै प्रदेशका केही स्थानमा दिउँसो मेघगर्जन र चट्याङसहित हल्कादेखि मध्यम वर्षाको सम्भावना छ । कोसी, वाग्मती, गण्डकी र लुम्बिनी प्रदेशका एकदुई स्थानमा भारीदेखि धेरै भारी वर्षाको पनि सम्भावना छ । 

देशका उच्च पहाडी तथा हिमाली भूभागका थोरै स्थानमा हल्का वर्षा र हिमपातको सम्भावना छ ।

विभागले राति देशभर आंशिकदेखि साधारणतया बदली रहने बताएको छ । कोसी, वाग्मती, गण्डकी, लुम्बिनी प्रदेश र सुदूरपश्चिम प्रदेशका केही स्थान र बाँकी प्रदेशका थोरै स्थानमा मेघगर्जन र चट्याङसहित हल्कादेखि मध्यम वर्षाको सम्भावना  छ । 

कोसी, मधेस, गण्डकी र लुम्बिनी प्रदेशका एकदुई स्थानमा भारीदेखि धेरै भारी वर्षाको पनि सम्भावना छ । देशका उच्च पहाडी तथा हिमाली भूभागका थोरै स्थानमा हल्का वर्षा र हिमपातको सम्भावना छ ।

हाल कोसी, मधेस, वाग्मती, गण्डकी प्रदेशका केही भूभाग र लुम्बिनी प्रदेशका पूर्वी क्षेत्रका थोरै भूभागमा मनसुनी वायुको प्रभाव रहेको छ । 

देशको पश्चिम भू–भागमा पश्चिमी र स्थानीय वायुको आंशिक प्रभाव रहेको छ । भारतको पश्चिम बंगाल आसपासको क्षेत्रमा बनेको न्यूनचापीय क्षेत्रको समेत आंशिक प्रभाव रहेको विभागले बताएको छ ।