नयाँ दिल्ली । भारतको राजधानी नयाँ दिल्लीकी जलस्रोतमन्त्री आतिशीलाई अस्पतालमा भर्ना गरिएको छ । दिल्लीमा पानीको अभाव भएपछि उनी अनशन बसेकी थिइन् । त्यसक्रममा स्वास्थ्य अवस्था बिग्रिएपछि आईसीयूमा उनको उपचार भइरहेको जनाइएको छ ।

उनी पाँच दिनदेखि अनशनमा थिइन् । हरियाणा सरकारले दिल्लीलाई पानी नदिएको आरोप लगाउँदै आम आदमी समर्थित जलस्रोतमन्त्री भोक हड्तालमा उत्रिएकी थिइन् । उनलाई मंगलबार बिहान अस्पतालमा भर्ना गरिएको जनाइएको छ ।

संघमा झैँ हरियाणामा भाजपा नेतृत्वको सरकार छ । भाजपा हरियाणाले उनको आरोपको खण्डन गरेको छ । दिल्लीमा पानीको अभाव हुनुमा आम आदमी नै जिम्मेवार रहेको उक्त पार्टीले जनाएको छ । बीबीसी हिन्दीबाट ।